ORANJESTAD (AAN): Comision Copa Hubenil Gobernador Felipe B. Tromp ta informa cu inscripcion ta habri pa entrega nominacionnan pa Copa Hubenil Gobernador Felipe B. Tromp pa aña 2026.
Ultimo dia pa entrega un nominacion lo ta diaranson 8 di april 2026 na Asociacion Trabou di Hubentud na Aruba (ATHA).
Na aña 1992, e Copa Hubenil a wordo estableci oficialmente. Esaki a tuma lugar despues cu señor Felipe B. Tromp, kende a sirbi como prome Gobernador di Aruba, a pasa e responsabilidad pa su sucesor, mr. Olindo Koolman.
Felipe B. Tromp a nace na Aruba riba 15 di oktober 1917 y a fayece riba 12 di augustus 1995. Durante su bida, el a distingi su mes como un figura importante den e desaroyo social y cultural di nos isla. El a tuma parti activamente den varios iniciativa y organisacion cultural, entre nan Fundacion Centro Cultural Aruba.
E fundacion menciona tabata encarga cu e promocion y desaroyo cultural na Aruba, y pa hopi aña el a haya respaldo financiero for di Sticusa, un fondo hulandes cu a brinda apoyo durante e periodo di 1948 te 1991. For di 1984, e recurso financiero a ta wordo dirigi directamente na Aruba.
Ademas di su trabou den e campo cultural, Tromp a ocupa varios posicion den servicio publico. El a desempeña su mes como politico, ministro y inspector di enseñansa. Na 1986, el a marca historia como e prome Gobernador di Aruba.
Kendenan ta bini na remarca pa e copa Hubenil?
Un hoben of organisacion hubenil cu a destaca durante e ultimo aña sea riba tereno cultural, social of deportivo por wordo nomina. E edad mester ta entre 6 pa 20 aña. Y e periodo di e logronan mester ta di 15 di april 2025 pa 8 di april 2026.
E logronan por ta premionan gana, pero tambe hopi importante loke e hoben of grupo a haci na nan propio formacion manera curso, trabou comunitario, disciplina etc.
Comision ta invita tur instancia cultural, social y deportivo pa repasa e actividadnan realisa pa nos hobennan durante e periodo menciona y pa manda e nominacionnan prome cu 8 di april proximo. E ganado(nan) lo ricibi e premio for di man di Su Excelencia Gobernador di Aruba dia 27 di april, dia di Rey.
Por entrega e nominacionnan via e link comunica ariba ATHA su pagina di Facebook: ASOCIACION TRABOU DI HUBENTUD NA ARUBA – ATHA, personalmente na ATHA situa na Caya Appeldam # 2 of via email This email address is being protected from spambots. You need JavaScript enabled to view it..
