E lider di programa Shalinie Flores:
ORANJESTAD (AAN) – Shalinie Flores, Programmaleidster na Centro di Bario Lago Heights, den un conferencia di prensa a haci e lanzamento oficial di e Programa “Leaning Links” cu ta un combinacion di tayer y seminarionan, pa diferente grupo den comunidad, den cualnan lo trata temanan manera Plantacion, Arte, Recreacion, y hopi cos mas util cu e participantenan por uza den nan bida diario di forma inmediato.
Learning Links ta un programa cu lo core for di dia 1 di September 2023 te cu April 2024, unda tin diferente tayer di trabao. Mayoria ta un vez pa luna y tin biaha dos vez pa luna, Flores a comenta, agregando cu cada luna lo cera cu un fiesta den bario. “Un fiesta no solamente pa ‘show case’ e talentonan y tur loke nan a haci durante e luna pero tambe pa celebra San Nicolas: e sabor, e sonido, e ritmo di San Nicolas, cu hopi biaha nos ta link solamente na carnaval, pero nos tin hopi mas, pa ofrece Comunidad. Pues, nos ta invita tur hende pa bin fin di luna, tur luna, pa celebra hunto cu nos”, Shalinie Flores a duna di conoce.
Seguidamente, el a splica tocante e proyecto mes. El a bisa cu e ta dirigi na famianan, adulto mayo, famia cu muchanan, y e idea su tras ta pa e participantenan uni cu otro a base di vocacion. “Por ehemplo, bo gusta mata, no solamente un oma of omo ta bin, un tanta grandi, pero tambe e chikitonan cu kier siña con pa planta, kico pa haci cu irigacion, kico lo por prospera na Aruba, con bo ta haci un buket chikito, areglonan chikito, kiermen b o ta deal cu hopi aspecto di loke ta e temanan en general”, Shalinie Flores a subraya.
El a menciona cual ta e temanan cu lo worde trata, reiterando Plantacion, como tambe Arte y Expresion, Recreaccion Educativo, Cosemento, Arte Culinario Sostenible, Nutricion, Presupuesto. Pues, e participante ta haci cosnan dushi pero tambe saludable pa bo curpa na termino largo.
“Nos kier empodera nos hendenan. Nos tin tayer pa esey di Empoderacion Propio, talento y pasionnan cu nos tur tin sconde, y cu ta leuk pa bo siña descubri nan hunto den un grupo apasiona riba e temanan aki. Resiliencia, voor pa nos muchanan chikito cu ta den e proceso di siña, crece, haya sa ken nan ta, con nan ta desaroyando, loke ta hopi importante. Y tambe tin gruponan di sosten pa mayor y pa mayornan activo”, Shalinie Flores a señala.
