ORANJESTAD (AAN): Partido AVP ta convenci cu e aparato aki, un PET Scan lo ta hopi valioso pa Aruba.
Segun e partido, den un esfuerso mutuo pa fortifica servicio medico na Aruba y mehora e calidad di cuido pa pashentnan, e fraccion a haci entrega oficial di preguntanan parlamentario. E preguntanan aki ta concerni e deseo pa Aruba mes por yega na tin un PET Scan. Esaki lo percura entre otro pa no ta necesario mas pa manda pashentnan pa e tipo di examennan medico aki bay den exterior.
Compra di un PET Scan pa Dr. Horacio Oduber Hospital renoba no tin solamente un bentaha potencial pa laga pashentnan keda den nan ambiente familiar y di amistad, pero ta brinda tambe perspectiva pa servicio medico mas amplio na islanan bisiña manera Curaçao, Bonaire, St. Maarten, Saba y St. Eustatius. Ta asina cu un PET Scan ta mas deseabel den cierto caso cu un CT-Scan. E calidad di examen medico lo mehora enormemente cu Aruba su propio PET Scan.
PET Scan ta nomber di un un tecnica di crea imagen pa medicina, cu ta bin di e nomber “Positron emission tomography”, cu ta un tecnica cu ta usa substancianan radioactivo conoci como ‘radiotracers’ cu ta visualiza y midi cambionan den procesonan metabolico, y detecta glucose radioactivo. E ta yuda bo docter mira con bon bo organo y demas fibra den bo curpa ta funcionando.
E PET Scan por mustra cual area di cerebro ta usando glucose mucho mas hopi. Ora un specialista interpreta e scan aki, nan por check pa malesanan den bo curpa. E PET Scan por midi fluho di sanger, uso di oxigeno, y con bo curpa ta usa sucu, y mucho mas.
AVP a indica cu en bista di un mehoramento di servicionan medico firmantenan ta desea di haya un conocimento di e factibilidad di un PET Scan pa Aruba. Den cuadro di esaki ta sigui un serie di pregunta pa loke ta e actual practica di manda pashentnan den exterior pa un procedura di PET Scan. E preguntanan aki no ta enfoca solamente riba e factibilidad financiero pa un posibel compra di un PET Scan y e servicio regional, pero tambe e bienestar di pashentnan mes y e importancia di examennan asina den un ambiente di famia y amistad.
E preguntanan cu AVP a haci na e Minister encarga cu Salud Publico ta encera temanan manera cuanto pashent a base anual ta worde manda pa exterior pa haci un PET Scan, e gastonan cu esaki ta trece cu ne, e periodo di estadia den exterior, e necesidad di un acompañante y gastonan envolvi cu esaki, experiencia cu aparatonan den exterior y calculacion di e gastonan pa compra di un PET Scan pa Aruba.
Fraccion di AVP ta pidi Minister pa den un forma critico huzga e practica actual y pa evalua seriamente e compra di un PET Scan. E paso aki lo tin un impacto positivo pa Aruba y lo fortifica rambe e posicion di competencia di Aruba como proveedor di servicio medico den nos region.
