Lansamento di Logo y Facebook Page di Scol Saludable

Giovanni Locadia, docente y consehero Scol Saludable:

ORANJESTAD (AAN)—Diabierna ultimo a tuma lugar e lansamento di Logo y Pagina di Facebook di Scol Saludable, y haci entrega di certificadonan tambe, na e coordinadornan cu a bira Maestro di Scol Saludable.

Den e ocasion aki señor Giovanni Locadia docente y tambe consehero di Scol Saludable a bisa den entrevista cu DIARIO, cu e dia aki a certifica e coordinadornan di scol saludable cu ta atende cu e Siman di Scol Saludable.

E scolnan cu ta cay bao Scol Saludable ta bay pone un poco mas atencion riba e siman aki y ta bay papia kico ta Scol Saludable ta. “Hopi biaha, ora nos papia di scol saludable, nos ta papia riba dos cos: e parti di comemento y e parti di movecion.

“Pero den e caso aki e ta encera hopi mas cu esey, pasobra bo ta papia di e parti higienico, sexualidad, e parti social, emocional, pues hopi aspecto mas cu ta tuma lugar.

“Normalmente, scolnan ya caba ta haciendo algo pa scol saludable, pero e Siman di Scol Saludable nos ta para keto e siman aki, na unda cu nan ta bay pone extra atencion riba diferente temanan. Anto nan mes, como coordinador, a traha riba e siman aki”, Meneer Locadia a indica.

El a agrega cu intencion ta pa tur aña ta bay tin un temporada cu tur e coordinadornan aki ta bolbe bin hunto y ta bolbe prepara pa e Siman di Scol Saludable tuma lugar.

El a menciona cu nan a cuminza cu un “pilot” seis scol, y awo tin 16, y tin mas scol cu ta bezig preparando pa drenta den e trayecto aki.

“Den e siman aki tambe nos ta bay ta preparando pa lanzamento di nos logo. Esey ta algo cu nos tin basta aña wardando riba dje y tambe scolnan cu ta cay bao scol saludable ta puntra ki tempo e lanzamento ta bin dilanti y na mesun momento pa e facebook, pasobra nan ta sinti orguyoso pa forma parti di Scol Saludable”, Locadia a señala.

Aworaki nan ta centra di scolnan basico, y despues di esey nan ta bay den un stap mas leu. Nan deseo ta pa tur scol na Aruba bay den scol saludable, manera minister di Salud mes a yega di vocifera.