Lansamento di documentario ‘Turning the Tide’ ta mustra esfuersonan pa conservacion di naturalesa di Aruba

ORANJESTAD (AAN):  Aruba Conservation Foundation, hunto cu su partnernan Universidad di Aruba y ScubbleBubbles Foundation,

den colaboracion cu Wageningen University and Research, a invita DIARIO pa e lansamento di e documentario emocionante yama ‘Turning the Tide’.

            E documentario ta mustra e esfuersonan continuo di organisacionnan local, regional, y internacional pa restaura e rifnan di coral y mondinan di mangel di Aruba. A traves di e proyecto piloto ‘Turning the Tide’, cu a lansa den maart 2023, ta busca manera pa fortalece y conserva e ecosistema marino di nos isla.

            E evento a duna miembronan di prensa e oportunidad unico pa presencia e lansamento di e documentario, cu ta un logro historico pa Aruba. Ademas, tabatin un dialogo cu representantenan di e diferente organisacionnan cu a traha hunto pa haci e proyecto aki posibel.

            Conservacion di naturalesa y proteccion di nos rifnan di coral ta fundamental pa e biodiversidad y turismo di Aruba. E documentario ‘Turning the Tide’ ta sirbi como un inspiracion pa mas esfuersonan den e direccion aki.

            E lansamento ta trece speransa y un bista riba un futuro sostenibel pa nos isla. Miembronan di comunidad y interesadonan ta keda invita pa sigui e desaroyo di e iniciativa aki y contribui na e conservacion di nos naturalesa.

            E documentario a wordo lansa na The Movies Aruba na Gloria y lo keda pasa te cu 14 di februari 2025 den tres localidad: Gloria, Renaissance y Principal (San Nicolas).