ORANJESTAD (AAN): Conseho di minister, riba proposicion di secretario di estado Zsolt Szabo di Digitalisacion y Relacion di Reino,
a bay di acuerdo cu nombramento di señor Gerbert Kunst como Representante nobo di Hulanda na Aruba, Curaçao y St. Maarten. E nombramento di señor Kunst ta drenta na vigor entrante 15 di mei 2025.
mr. G.P.G. (Gerbert) Kunst na e momentonan aki ta director di Maneho Internacional na ministerio di Enseñansa, Cultura y Ciencia (OCW). E tabata anteriormente entre otro consul-general di Reino Hulandes na San Francisco y director di Asuntonan Europeo y Internacional na ministerio di Asuntonan Economico (EZ). Señor Kunst a studia derecho na Leiden y ademas ta posee un Master of Business Administration (MBA) y un Master of
Public Administration (MPA).
Representacion di Hulanda na Aruba, Curaçao y St. Maarten (VNACS) tin oficina na Willemstad (VNW), Oranjestad (VNO) y Philipsburg (VNP) y e ta representa Hulanda den e tres paisnan. E Representante ta na cabes di nan y ta hunga un rol crucial den mantencion di un bon relacion cu e tres paisnan autonomo. VNACS ta contribui na realisacion y implementacion di e maneho Hulandes pa e paisnan.
Tambe VNACS ta brinda ayudo y asistencia na Hulandesnan den necesidad y ta coordina e maneho di dunamento di asistencia for di Hulanda den caso di crisis grandi. VNACS ta eherce su tareanan den bon cooperacion cu tur cuater pais den Reino.
Gerbert Kunst aki a declara: “E ultimo añanan mi por a contribui for di e ministerio di OCW, hunto cu coleganan di Aruba, Curaçao y Sint Maarten, pa fortifica cooperacion den Reino riba tereno di enseñansa, cultura y ciencia. Por ehempel, pa medio di creaccion di e Strategic Education Alliance.”
El sigui bisa: “Cu e experencia ey y e firme conviccion cu a base di un posicion di igualdad, e cuater paisnan por logra mas hunto den contexto di Reino, cu cada un riba nan mes, mi ta ansioso pa bay representa Hulanda riba tereno di maneho gubernamental den e tres paisnan ey. Y principalmente tambe pa haci esaki cu un team di coleganan motiva na e tres oficinanan, cu kende gustosamente lo mi ta desea di ta e conexion principal pa tur partner manera gobiernonan, companianan y sociedad civil, den e relacion aki.”
Secretario di estado Szabo ta contento cu e nombramento y el a declara: “Gerbert Kunst ta trece un rikesa na experencia internacional y for di Den Haag cune. E ta un profesional motiva y mi ta spera cu hunto cu su coleganan e lo bira e intermediario importante cu por duna un contribucion riba tanto tereno economico-financiero, como e tereno di mantencion di ley, pa amplia y profundisa e relacion. Mi ta contento cu nos a haya un candidato pa e puesto aki, cu en bista di su conocemento y experencia cu e partinan Caribense di Reino, tin bista pa loke tin mester pa un bon cooperacion entre Hulanda y Curaçao, Aruba y St. Maarten.”
Te ora cu e representante nobo asumi su encargo, drs. S.J.P.L. (Saskia) de Reuver, a base di su funcion como director Relacion di Reino/Paisnan na ministerio di Asuntonan Interno y Relacion di Reino, lo reemplasa como Representante na Aruba, Curaçao y St. Maarten.
