Lady Ruthy a entrega su buki nobo na Biblioteca Nacional

ORANJESTAD (AAN): Señora Ruthy Vrieswijk-Bergen a publica un buki nobo titula ‘Alegria di Ruthy: Poema 2’.

   E poeta a entrega diferente ehemplar na directora di Biblioteca Nacional Aruba, señora Astrid Britten. Y tambe Ruthy a haci entrega di su buki pa e coleccion nacional na señora Zetsia Ponson, hefe di Dept. Arubiana.

   Esaki ta un obra di 47 poema publica na 2020. Nan ta expresa goso, admiracion pa e creaccion y gradicimento. Tur ta toca e tema di ‘Amor y amistad’ y Lady Ruth a dedica e buki na su nietonan, Edward y William. Esaki ta e di dos buki di poema di Lady Ruth.

   Esaki ta un proyecto realisa cu ayudo financiero di UNOCA y Prins Bernhard Fonds Caribisch gebied. Ilustracion na color ta di diseñador grafico  señora Irene Peterson y coreccion tabata den man di linguista sr. Ramon Todd Dandare. Otro publicacion di poeta Ruthy ta ‘Sigui inspira...pa duna’ y ‘Poemanan di Ruthy’. Ruthy ta gusta presenta y declama poema tambe.

   Ruthy ta skirbi regularmente den DIARIO di su experencianan riba tereno social, cultural y literario. Lady Ruth ta conoci tambe pa su programa na radio ‘Dushi awacero musical’. E publicacion aki lo ta disponibel pa usuarionan di biblioteca por lesa.

   Ruthy a nace na Aruba y semper a biba aki. Un maestro di Avond-HAVO a inspira Ruthy pa pone su pensamentonan riba papel y cu su 16 aña el a cuminsa skirbi versonan simpel cu ta rima y esaki ta su estilo faborito. Cu tempo el a expresa su mes den otro tipo di expresion tambe, cu no ta rima.

   Poemanan, hopi largo tin biaha, cu hopi ripiticion pa accentua su pensamento. E gusta! Ruthy ta casa cu Johan vrieswijk y e ta mama y wela, Lady Ruth tin 1 nieta y 4 nieto di edad 8, 10, 13, 15 y 17 aña.