LabHOH Aruba a dicidi na haci bunita donacion pa Haiti

Dos aparato Vitek a worde transporta via Farminpex Curaçao

ORANJESTAD (AAN): Asina cu e peticion a drenta pa yuda pais bisiña Haiti cu donacion di aparato, LabHOH a duna inmediatamente e contesta afirmativo.

   Pues, dos aparato special di diagnostico, conoci como “Vitek Machine” cu ta identifica bacterianan di un ‘kweek’ y asina asisti na un tratamento p'e pashent a worde prepara pa asina haci e bunita gesto aki. LabHOH a tuma e decision aki sin duda.

   Ta sali for di e punto di bista cu hunto por logra mas, door di no solamente comparti conocemento pero den e caso aki cu aparatonan specialisa di cuido cu ta aporta na un miho salud publico tambe pa paisnan den region.

   Un tremendo donacion mirando cu e aparatonan aki ta esencial pa detecta y identifica varios bacteria p.e. di urina y asina aporta den e diagnosis di condicionnan di salud y asisti na trece solucion sea cu antibiotica of otro tratamento pe pashent. 

   E compania Farminpex Curaçao na e momento ey tabata encarga cu upgrade di e aparato Vitek 2 modelo Compact pa un Vitek 2 modelo 60 PC pa departamento di microbiologia di LabHOH ora a ricibi un carta di St. Damien Children’s Hospital na Haiti cu a pidi ayudo. Nan a dicidi e ora ey di puntra LabHOH si ta dispuesto pa yuda cu’n donacion y e proceso a cuminsa cana. 

   E dos aparatonan aki tabata den proceso pa worde cambia y lo no ta den uso mas, pero sinembargo ta den bon condicion y sigur ta funciona pa diagnostico. Un mashin di balor grandi cu LabHOH ta contento cu por otorga na un otro Hospital den necesidad.

   E prome paso den e proceso logistico ta decontaminacion. E mashinnan a worde decontamina door di coleganan na departamento di electronico medico manera protocol ta dicta pa asina garantisa e calidad y estado di e aparato. Conhuntamento cu Farminpex a percura depues pa e parti logistico pa transporta e aparatonan prome pa Curaçao y despues Farminpex Curaçao a tuma over pa manda e mashinnan pa St. Damien Children’s Hospital na Haiti. 

   Un bunita gesto di parti di e departamento di microbiologia di LabHOH, cu ta acredita cu e standardisacion di ISO 15189: 2021 garantisando asina calidad y experticio, y brindando sosten na nos paisnan den region. LabHOH ta confia cu e aparato aki lo duna su fruto yudando e comunidad di Haiti cu diagnosis di salud.