ORANJESTAD (AAN): Dialuna mainta, Prome Minister Evelyn Wever-Croes, den nomber di Gobierno di Aruba, a expresa palabranan di profundo condolencia y forsa na famianan cu siman pasa y durante fin di siman a perde sernan kere den manera tragico.
Alavez, Prome Minister ta pidi cada ciudadano pa ta mas prudente den tur cos especialmente ora di sali di cas pa pensa cu tin limite y cu cada un di nos tey pa cuida otro.
“E siman aki ta habri nos cu un curason cu hopi dolor, debi na un fin di siman tragico cu nos a pasa aden. Esaki despues cu siman pasa un hoben di apenas 19 aña a perde su bida den un accidente di brommer.
Diadomingo, riba un solo dia, 4 conciudadano di nos pais derepente a perde nan bida den sucesonan tragico. Dos ruman muhe hunto. Un a fayece cu su mesun baby di 2 aña y hunto cu ne otro ruman a fayece y hunto lagando yiunan chikito atras. Esta un tristesa profundo pa famianan, cu a perde tres miembro keri di famia, y tin mas miembro di famia, den e caso aki muchanan chikito, cu ta bringando pa nan bida. Un dolor enorme.
Di parti di Gobierno di Aruba nos ta desea famia Wouters y conocirnan, hopi hopi forsa den e momentonan sumamento dificil y doloroso aki.
E accidente tragico ya a cuminsa worde investiga y mi ta spera cu pronto e raport lo keda cla y si tin hende cu mester para responsabel pa nan acto, husticia lo tuma su curso y atende cu esnan envolvi cu a causa e accidente horibel aki.
E otro caso tragico cu a shock nos ta di e hoben di 24 aña cu a hoga durante di un Pool Party. E incidente aki tambe na e momento aki ta bao di investigacion y mi ta spera pronto e raport aki tambe keda cla. Gobierno ta manda palabra di condolencia na famianan.
Berdad e investigacionnan ya a inicia, Sinembargo mi mester bisa cu raportnan di investigacion no ta bay alivia e dolornan inmenso di Yiu, Mama, Tata, Wela y demas miembronan di famia.
Nos a drenta awor den e ultimo 3 lunanan di aña 2022. Ta nos deseo cu hunto nos lo pasa e siguiente dia, siman y lunanan cu menos incidente lamentable posibel. Nos por logra esaki door di sea mas prudente den tur cos cu nos ta haci. Ora cu bo ta riba caminda pensa cu no ta abo so ta riba caminda, cu tin otro autonan cu tin miembronan di famia, mama, yiunan, wela welo; ora di sali fiesta nos mester
Pa un isla chikito manera Aruba, tin 4 morto tragico den un fin di siman ta un golpi duro pa nos comunidad. El a afecta ami hopi, mescos cu el a afecta miles di famia na Aruba.
Mi ta pidi pa nos tur uni den curason y resa pa e famianan di e victimanan. Ohala cu nos oracion y sentimientonan di compasion por ta consuelo pa e famianan. Laga nos resa tambe pa esnan cu ta den hospital pa nan pronto recuperacion. Y cu Mirella, Joanne, Rendrick, Daniel y Angel Gabriel sosega na paz den brasa di Señor”.
