La Quinta Beach Resort y Arubalife Organics ta lansa colaboracion local  

ORANJESTAD (AAN): Forma aliansa significativo cu nos comunidad ta un parti central di e compromiso di La Quinta Beach Resort pa promove turismo responsabel.

Esaki a keda refleha un biaha mas durante e ultimo Eagle's Nest Gathering, unda miembronan, huespednan, partnernan y empleadonan a reuni pa celebra entrepreneurship local y sostenibilidad.

E anochi a conta cu señora Julienne Heronimo, fundador di Arubalife Organics, kende a comparti e historia tras di su marca local y e importancia di scoge pa productonan natural y traha na Aruba.

"Un di e metanan di La Quinta su Eagle's Nest Gathering ta pa trece nos bishitantenan mas cerca di e comunidad Arubiano," asina Ursell Arends, Director di Operacion di La Quinta Beach Resort, a menciona. "Door di crea oportunidad pa conecta cu negoshinan local, organisacionnan y fundacionnan, nos ta spera cu nos miembronan y bishitantenan experiencia hopi mas cu djis Aruba su playanan tan admira. Nos kier pa nan conose e hendenan, e historianan y e iniciativanan cu ta yuda forma un isla mas sostenibel. Door di fortalece e relacionnan aki, nos por contribui na un sector turistico cu no solamente ta balora Aruba su solo, santo blanco y lama blauw, sino tambe e hendenan y organisacionnan cu ta traha tur dia pa proteha nos medio ambiente."

E Eagle's Nest Gatherings ta sigui sirbi como un plataforma unda organisacionnan local, negoshi y lidernan di cambio por comparti nan trabou, mientras cu nan ta inspira conversacionnan significativo tocante sostenibilidad y compromiso cu nos comunidad.

La Quinta, pa decadas caba ta kere cu crea un experiencia berdaderamente relaha ta bay mas aya cu simplemente ofrece un luga pa keda. E ta nifica yuda nos miembronan y bishitantenan conecta cu Aruba di un forma mas profundo, cu su hende, su naturalesa, su cultura  e organisacionnan local cu ta haci nos isla asina special.