La Quinta Beach Resort a invita Turtugaruba pa conscientisa comunidad riba temporada di turtuga y comportacion responsabel na Eagle Beach

ORANJESTAD (AAN):   Como parti di su compromiso continuo cu turismo responsabel, La Quinta Beach Resort a dedica su mas reciente encuentro

di Eagle’s Nest Gathering na un tema esencial pa nos isla: proteccion di turtuga di lama. Pa esaki, e resort a invita Turtugaruba Foundation pa conecta directamente cu su miembronan y stakeholder.

Durante e anochi, Turtugaruba a comparti informacion valioso riba nan trabou, for di monitoreo diario di beach y di neishi, te cu rescate, investigacion cientifico y programa di educacion comunitario. E mensahe tabata cla, proteccion di turtuga di lama no ta solamente trabou di un fundacion, pero un responsabilidad comparti entre sector turistico, comunidad local y bishitantenan.

E encuentro a ofrece espacio pa reflexiona riba con simpel accionnan, manera respeta distancia, limita luz artificial y raporta actividad sospechoso riba nos beach nan, por tin un impacto directo riba sobrevivencia di e especie.

Dia 1 di maart, e temporada cu turtuga di lama ta pone webo riba nos beachnan a oficialmente inicia. Ta importante pa ta alerto durante maart te cu september riba cualkier pista cu lo por ta di turtuga di lama. Por tuma contacto directo na e Turtle Hotline +297 5929393 pa manda potret of video, hunto cu e localidad cu a nota posibel movecion di turtuga di lama.

Tambe ta importante pa recorda cu luz artificial, incluyendo luz di pantaya di telefoon, flash y di auto, por desorienta turtuganan, specialmente crianan. Ora bishita beach anochi, mantene scuridad y respeta e proceso natural di turtuga di lama pa pone webo.

La Quinta a tuma paso concreto pa adapta tur su luznan exterior pa cumpli cu e standardnan di proteccion di turtuga di lama, reduciendo e impacto di luz artificial riba beach y aportando activamente na conservacion di e especie.

Turtuga di Lama ta haci algo extraordinario, cada pasa 2 pa 5 aña, nan ta bolbe bek na e mesun beach unda nan a nace pa pone nan webo. E mesun orguyo cu nos como local tin pa Aruba, e turtuganan tambe ta regresa na nan tera natal pa continua nan ciclo di bida riba nos isla.

La Quinta ta reconoce cu proteccion di nan habitat ta un responsabilidad comparti. Pa e motibo aki e resort ta fortifica su rol como aliado den sobrevivencia di e especie y ta haci un yamada na tur hotel y establecimento cerca di beach na Aruba pa implementa practicanan similar. Por acudi directamente cerca Turtugaruba pa guia y tambe pa bira boluntario.

Segun dato comparti door di Turtugaruba Foundation, solamente 1 di cada 1000 cria ta sobrevivi pa yega madurez, pues un simpel cambio di luz por ta e diferencia entre bida of morto, conservacion of extincion.