Director Rhomyko Winklaar:
ORANJESTAD (AAN) Señor Rhomyko Winklaar, director di Fundacion Anti Droga Aruba, den entrevista cu DIARIO, a duna di conoce cu FADA a wordo invita, pa duna un presentacion tocante loke ta nan trabao diario den comunidad y, naturalmente, nan ta duna e comunidad y awo a toca nan presenta esaki na Parlamento.
“P’asina tur miembro di Parlamento ta informa tocante nos e labornan cu nos ta haci”, director di FADA a indica.
El a señala cu tin hopi desaroyo ta tumando lugar, y naturalmente como un isla turistico, ta hopi turista ta bishita Aruba.
“Naturalmente, hopi turista ta bin pa diversion, pa e Happy Island, y esaki ta trece cu ne cu nos hobennan tambe ta biba un bida di fiesta henter dia. Pero tambe nos tin cu corda riba nos debernan cu tin cu cumpli cu ne, nos bida diario, nos tin nos tareanan den comunidad, y asina tambe labornan cu nos tin di cumpli cu ne, y hopi biaha por wak cu hobennan no ta para keto na esaki y e parti di responsabilidad tambe cu ta trece cu ne. Pues, e ora ey bo ta haya bo cu nan ta bay haci uso di substancianan cu tin eyfo, legal y ilegal y eynan ta caminda cu FADA ta cay aden e ora ey”, señor Winklaar a señala.
Director di FADA a señala cu hopi biaha nan ta keda babuca pasobra e muchanan ta fit nan cu hopi informacion tocante substancianan, of kimiconan cu tin riba caya, y hopi producto cu FADA no di dje ainda.
“Anto nos ta cera un convenio, den sentido di cera un amistad cu nan, pasobra nos tin trayectonan ta tuma lugar den scolnan, p’asina tambe nos por haya mas informacion di nan, y asina tambe nos por comparti cu resto di comunidad”, señor Rhomyko Winklaar a señala.
FADA, naturalmente, tin mester di mas fondo, ya cu a keda limita, y e stichting tin añanan ta boga pa nan aumenta. “Pa mercadeo, mester di fondo, pa nos tin e personanan indica tambe, nos mester di personal nos por draai esaki, personal chikito pero cu curazon naturalmente, y mi ta abraza mi coleganan den esaki, pero nos mester di mas. Nos mester di mas ‘mankracht’ pa nos por yega tur caminda, y esey ta hopi importante” Director di FADA, señor Winklaar a señala.
