‘La Comunidad Civil Unida’ di Venezuela cu evento pa celebra El Arepazo dia 12 di September venidero

Miriam Parra ta splica:

• Pa recauda fondo pa damnificadonan na Venezuela y Colombia 

ORANJESTAD (AAN)-- Señora Miriam Parra, miembro di “La Comunidad Civil Unida” cu ta integra pa un grupo di Venezolano, cu a uni nan mes cu un solo proposito:  Celebra e Dia di “Arepazo”, cu ta un dia mundial cu ta wordo celebra Dia 12 di September, na tur pais.

   “Y nos, aki na Aruba a tuma e iniciativa di por bin hunto pa apoya tur e personanan damnifica na Venezuela y Colombia. E ta parce mi un obra super bunita, y awendia, specialmente na Venezuela, manera nos tur sa, e situacion politico di nos pais ta bastante fuerte, y no a yega ainda e suficiente ayudo, aunke nos ta gradici henter mundo pa tur colaboracion cu a brinda nos, for di pafo. Pero paden mes di nos pais, nos a topa cu hopi dificultad, y nos tin hopi necesidad den nos pais”, señora Parra a relata.

   El splica cu “El Arepazo” a wordo crea na aña 2012, como un evento pa celebra e Dia di Arepa, y den diferente pais ta wordo celebra pa e consumidornan conoce e diferente menu cu tin “den nos arepa stima”, señora Parra a señala.

   El a agrega cu cien porciento di tur loke nan por recauda durante e evento aki, dia 12 di September awo, lo bay pa donacion na diferente fundacion, por ehemplo “Caritas” tanto di Colombia como di Venezuela, pa colabora cu e personanan  damnifica di e teremoto.

   “Señornan, nos mester pone man na curazon; nos no a yega na e totalidad pa recauda. Na nivel mundial a yuda masha hopi mes, pero lamentablemente ta haci demasiado falta ainda, anto 100% lo ta pa e damnificadonan, mi ta reitera”, señora Miriam Parra a remarca.

   El a agrega cu pa esaki tur estudio a wordo haci, y esaki ta un realidad cu no por tapa cu un dede, y nos ta mira e noticianan cu ta keda corto pasobra e berdad no ta sali realmente na luz publico, locual ta sali den television no ta ni e cuarto parti di loke ta wordo necesita. E invitacion pa colabora ta pa henter pueblo di Aruba y pa touch e curazon di tur residente Venezolano y Colombiano akinan, pa uni na e causa aki cu ainda nos por contribui.

   E evento ta mara na un suma di entrada, y lo tuma lugar na Villa Floralina. “Cu e entrada nan ta bay participa den mas di 30 premio pa cual tin ya tin patrocinador. Lo tin torneo di Domino, musica en bibo, y ta un evento hermoso pasobra ta un colaboracion di nos tur”, señora Parra a conclui.