Di e personanan cu limitacion na Aruba
ORANJESTAD (AAN): Cu gran orguyo y un vision renoba pa futuro, ta anuncia e fusion juridico y operacional di tres organizacion bon reconoci den e area di cuido di persona cu limitacion (intelectual) na Aruba: Asociacion Sonrisa, Fundacion Ambiente Nobo y Fundacion Trampolin pa Trabao.
Cu e paso historico aki, e tres organizacionnan aki ta uni forsa pa forma un solo entidad fuerte: Fundacion Sonrisa. Door di elimina e structuranan separa, Fundacion Sonrisa ta introduci un modelo innovativo di "Lifelong Care." Esaki ta nifica cu e fundacion lo bay ofrece apoyo y guia integral den tur fase di bida di nan cliente, cuminsando for di e fase prenatal y e prome añanan di bida, pasando pa hubentud, integracion laboral, te cu e cuido specialisa pa e clientenan cu ta adulto mayor.
Un historia di compromiso cu ta continua Asociacion Sonrisa a nace mas cu 35 aña pasa (1990) for di e iniciativa y e amor di un grupo di cinco mayor cu tabata busca un futuro sigur y un luga inclusivo pa nan yiunan cu limitacion. Y na 2009 a habri tambe Traimerdia Sonrisa pa muchanan cu limitacion. Na 2004 Fundacion Ambiente Nobo a lanta pa brinda un espacio di guia y cuido pa adultonan mayor cu un limitacion intelectual, mientras cu na 2009 a crea Fundacion Trampolin pa Trabao pa facilita e integracion y jobcoaching di e personanan aki den e mercado laboral local.
Awe, e tres pilarnan aki ta bira un solo fundacion fuerte. E fusion legal y structural a haya su culminacion despues cu a firma e acta di fusion notarial dia 22 di augustus 2026. Tur e actividadnan, e empleadonan y e proyectonan exitoso lo continua bou di e capa di Fundacion Sonrisa. Un vision integral pa e futuro.
E directora general di Fundacion Sonrisa, señora drs. Caroll J. Kock, a expresa e importancia di e paso aki: “Nos ta na vispera di un era nobo, yena cu speranza. Nos mision no ta solamente pa percura pa nos clientenan, sino tambe pa duna un apoyo na nan famia y cuidadornan den tur etapa di bida. Alavez, nos lo sigui fomenta un comunidad unda tur persona cu un limitacion (intelectual) ta ser balora, respeta y empodera pa desaroya nan talentonan al maximo.”
E structura nobo di e fundacion ta den un modelo di un One-Tier Board cu un Raad van Toezicht y un Kwaliteitsraad (Conseho di Calidad), den cual e bos di e clientenan y nan famianan ta keda central pa stimula e mehoracion continuo di e cuido y servicionan. Fundacion Sonrisa ta gradici e comunidad di Aruba, e boluntarionan, e partnernan strategico y e instancianan gubernamental pa nan sosten continuo. Nos ta invita e pueblo di Aruba pa sigui apoya e soño aki di un sociedad unda tur hende ta conta y por florece.
