ORANJESTAD (AAN): Awe, 20 di November ta honra un fecha di gran poder: Dia Internacional di Derecho di Mucha.
Un recordatorio mundial cu tur mucha, sin distincion, tin derecho pa crece den amor, siguridad, educacion, y respet. Aruba, como un isla chikito cu un curason grandi, tin e mes obligacionnan pa proteha e tesoronan di mas sagrado di nos pais: nos yiunan, nos muchanan.
Den un mundo cu ta cambiando asina lihe, nos muchanan mester sinti cu nan tin bos, cu nan por soña grandi, cu nan tin espacio pa desaroya talento sin miedo, sin abuso, sin discriminacion. Derecho di un mucha ta e fundeshi cu ta forma ciudadanonan fuerte, bunita di curason, y cla pa contribui na un Aruba mas husto.
Laga nos proteha nos muchanan. Asina nos ta proteha nan futuro y e futuro di nos pais. Inverti den nan bienestar. Nos muchanan tin bos. Scucha nan. E compromiso di tur nacion mester ta uni pa tur hunto sigui traha pa tur mucha por florece den dignidad, fe y speransa pa asina nos por tin un miho mundo.
