*Tin decisionnan impopular cu mester bay tuma - ORANJESTAD (AAN) – Omar Tromp, Presidente di Camara di Comercio y Industria di Aruba (KvK),
tabata presente den e conferencia di prensa yama pa Formador Evelyn Wever-Croes, den cual el a papia tocante e resultado di e reunion den cuadro di formacion di gobierno nobo.
Omar Tromp a relata cu e reunion cu Formador Evelyn Wever-Croes, RAIZ y e ekipo di MEP, a bay bon, y a splica cu KvK a toca e aspectonan cu for di nan punto di bista ta importante pa e siguiente gobernacion.
Tromp a subraya cu e formacion di gobierno nobo, den un coalicion, mester ta mas pronto posible pa Aruba tin e stabilidad bek como pais.
“Nos kier a wak si un coalicion mas amplio, pero no a sosode, pero nos kier wak un coalicion mas pronto posible in place”, Omar Tromp, presidente di KvK a expresa.
Prensa tabata tin pregunta pe tambe, por ehemplo con e ta mira e proceso di recuperacion economico. El a bisa cu pa loke ta turismo e ta un reactivacion basta fuerte, y KvK ta contento cu esaki a tuma lugar mas lihe cu por a spera. “Esaki ta bon pa nos turismo y e industrianan cu ta bin su tras cu lo beneficia di dje.
Tromp a subraya cu KvK ta spera cu esaki mantene su mes y nan ta vigilando si, y e ta kere cu nos tur na Aruba, e proceso di e variante Delta, tanto na paisnan cu ta nos fuente di entrada manera e parti Mericano, cu Aruba ta depende mayormente di dje.
El a expresa cu KvK ta contento cu e reactivacion economico tey te aworaki y e ta kere cu ta importante pa sigui cu e formacion di un coalicion pa un gobierno nobo, pasobra tin hopi cos cu mester atende cune, tanto na termino corto pa sigui cu e reactivacion economico.
E Landspakket tambe tabata tema di combersacion y hopi di e aspectonan cu KvK a trece dilanti, durante e reunion, ta den Landspakket manera e reformanan laboral, cu ta importante pa comercio pa comercio haya espacio pa reactiva na un manera mas flexible, tambe e reforma fiscal cu ta importante for di prome cu e pandemia a dal nos pais. Tambe e aspecto di cuido cu aworaki ta un punto di discusion importante, vooral door di e presion cu ta bin for di e Landspakket, pa tuma medidanan riba esaki. Pues ta aspectonan cu ta importante pa e futuro cercano di Pais Aruba su reactivacion economico.
Cual gobierno cu sinta mester tene cuenta cu esaki y Tromp ta spera cu e coalicion cu ta bay forma ta uno stabil, y tin decisionnan cu mester wordo tuma cu ta bay ta impopular, pero cu mester wordo haci pa e bienestar na termino largo di Pais Aruba.
