ORANJESTAD (AAN) -- Luigi Heredia, presidente di e Asociacion di Timeshare di Aruba (ATSA), a participa den e conferencia di prensa despues di a reuni cu Formador Evelyn Wever-Croes,
y el a elabora riba su impresion tocante e reunion informativo aki, den cuadro di formacion di e Gabinete Wever-Croes II.
Heredia a papia di un reunion hopi productivo, unda ATSA como Asociacion di Timeshare, a trece dilanti ocho punto pa e Formador.
El a expresa cu Aruba tambe ta sostene door di ATSA, cu ta un di e sectornan cu durante e pandemia a lanta Aruba y esaki ta e di tres biaha cu nan ta sostene Aruba den tempo di crisis.
El a subraya cu ATSA, como timeshare, no so ta contribui na e economia pero tambe nan a contribui pa nan empleadonan, ya cu ocupacion di nan propiedadnan a keda esun mas halto y nan a mantene hopi di nan trahadornan cu empleo, y nan resorts tambe a paga nan salario durante e pandemia.
Sin bay den detaye, Luigi Heredia a menciona e ocho puntonan cu e Asociacion a presenta durante e reunion cu Formador Evelyn Wever-Croes y Ursell Arends di RAIZ.
Nan ta: Ley laboral, Bubali Plas, Politica di beach, Educacion, Asuntonan financiero, Desaroyo di Aruba, Seguridad, Medio Ambiente y reciclahe.
Contestando un pregunta di prensa, el a bisa cu e recuperacion den sector di Timeshare ta bayendo hopi bon, ya cu esaki ta e unico cu durante e ceramento di frontera di Aruba, dos timeshare a keda habri y ora Aruba a inicia e apertura bek, nan tabata esun di mas halto unda cu nan tabata tin 70% di nan turismo, compara cu 35% cu a bin bek en general.
“E diferencia ta nos miembronan. Nos miembronan ta wak Aruba como nan segundo cas y ta wak e empleadonan manera nan famia . Despues tur nos miembronan a bin bek pasobra nan conoce Aruba y nan sa cu su propiedad ta proteha nan”, el a indica.
Tocante e variante nobo (Delta), Heredia a splica cu ademas di e reglanan cu gobierno tin stipula, den e sector di timeshare nan tin nan mes reglanan cu ta duna seguridad y precaucion pa su miembronan. Den nan resorts mes nan ta organiza nan fiestanan pa nan guestnan, y no kiermen cu nan no ta hopi preocupa pero si nan ta pendiente di e variante nobo di e virus y semper ta al tanto pa e seguridad di nan guestnan.
