Na 2009, un Nelly Schotborgh-van der Ven a presenta su thesis na Vrije Universiteit di Amsterdam.
Su topico a hala hopi atencion pasobra el a mishi cu corupcion na e paisnan Caribense cu ta partner den Reino Hulandes.
E caso fondo Desaroyo Nobo San Nicolas cu a tene Husticia na Aruba pa basta tempo ocupa, tabata entre e casonan concreto cu el a trece dilanti pa papia di e titulo di su thesis cu tabata “E rais di fraude publico y corupcion den e parti Caribense di Reino”.
1987 e scandal di Beta Hotel y 50 Mil Dollar cu lo a wordo paga na AVP
Como pais nobo, Aruba a enfrenta e scandal di Beta Hotel na 1987.
E Italiano Ghini Spartaco a pone Aruba den luz criminal internacional ora el a pretende cu 50 Mil Dollar lo a wordo paga na AVP relaciona cu garantia cu mester a wordo duna pa Beta Hotel.
E sistema di garantia pa hotelnan despues cu Lago a bay, riba su mes a bira un problema pa Aruba cu mester a wordo soluciona.
Henny Eman cu tabata Prome Ministro a nenga cu AVP a haya e suma aki y a bisa cu placa cu e partido ta ricibi como sosten no ta sumanan di 50 Mil Florin. El a admiti cu AVP a yega di haya asistencia financiero di Notario Croes, cu lo tabata mara na e caso.
2004: Rapport y explosion Caso Fondo Desaroyo Nobo San Nicolas
Riba peticion di Parlamento, Algemene Rekenkamer Aruba a realisa un investigacion riba e proyectonan relacion cu e Fondo Desaroyo Nobo San Nicolas, ehecuta dor di Gobierno Henny Eman.
E investigacion penal a conduci na persecucion penal di Prome Ministro Henny Eman y tres otro ministro di su gabinete.
E problema cu cuentanan anual di Aruba durante 1997-2001 a conduci na libertad pa Henny Eman mientras e otro tres ministronan a wordo condena dor di Huez.
Ministerio Publico a bay contra e libertad pa Henny Eman y e tres Ministronan a bay contra nan condena. E casonan den apelacion a wordo descontinua y e caso penal den apelacion a termina ora na beach na Aruba, abogado di Ministro a yega na un areglo cu Ministerio Publico cu ambos partido ta deshaci di bay den apelacion y asina e caso a termina na 2008.
2017 Ministro Paul Croes di Gabinete Mike Eman ta wordo condena
Na 2017, e investigacionnan y caso penal cu a tuma lugar durante gobernacion di Mike Eman como Prome Ministro entorno permisonan cu a wordo entrega door di Paul Croes como Ministro di Labor, a termina.
Paul Croes a wordo condena na castigo di prison pero a apela su caso.
Na 2021 e caso den apelacion lo presenta dilanti Huez.
2018 Algemene Rekenkamer Aruba ta entrega Rapport proyectonan Bo Aruba
Na Maart 2018, Algemene Rekenkamer Aruba, a entrega e rapport Bo Aruba na Parlamento di Aruba. Ta trata aki di investigacionnan cu a wordo realisa den cuadro di e proyectonan di Gabinete Mike Eman cu 1.6 Miljard Florin di Aruba sin e debido preparacion y administracion.
E rapport tabata cla prome cu eleccion 2017, pero a keda den lachi di Benny Sevinger kende hunto cu Mike Eman a ehecuta e proyectonan.
Reglanan di e Ley di Contabilidad a wordo kibra den e ehecucion di e proyectonan.
2019 Caso Ibis contra Otmar Oduber a cuminsa
Na 2019 e investigacionnan penal contra Ministro Otmar Oduber cu a haya e nomber di caso Ibis a haya nan inicio y ta continua.
2021: Gobierno ta cay pa motibo di investigacion penal Alan Howell
Na 2021, Aruba a conoce eleccion adelanta pa motibo cu na Maart 2021 Alan Howell a bira sospechoso pa motibo di malversacion cu placa di un fondo di Parlamento. El a nenga di entrega su retiro di su fraccion, loke a conduci na caida di Gobierno Wever-Croes.
2021: Benny Sevinger ta bira e prome Miembro di Parlamento eligi durante detencion
Na 2021 e investigacionnan cu a cuminsa contra Benny Sevinger den otorgamento di terenonan for di 2018, a culmina cu un cantidad di detencionnan.
AVP a insisti cu Benny Sevinger lo keda riba nan lista y a pidi votadornan pa vota pa Benny Sevinger loke a haci cu pa prome bez den historia di Aruba un Miembro di Parlamento no por huramenta pasobra e ta den detencion preventivo den prison.
