ORANJESTAD (AAN): Comite di Economia Informal di Camara di Comercio y Industria di Aruba (KvK) a duna
detaye di e progreso y e iniciativanan cu tin den plan pa bin, cu e meta di guia negoshinan informal pa pasa pa e economia formal di Aruba.
Actualmente, ta calcula cu e economia informal di Aruba ta representa aproximadamente 19% di Producto Interno Bruto (GDP), ekivalente na mas o menos AWG 1.4 biyon. Esaki ta resulta den un perdida anual calcula di AWG 340 miyon den entrada pa gobierno, ta crea competencia desleal pa negoshinan registra y ta laga trahadornan den sector informal sin proteccion laboral y social esencial.
Pa atende e desafionan aki, e Comite a lanza un strategia colaborativo cu e meta di aumenta conocemento tocante na e beneficionan di formalisa un negoshi, elimina malentendimentonan tocante impuesto y duna guia na empresarionan local.
Progreso y logro principal te awo
- Ruta Strategico y Plan di Accion: A desaroya un plan di accion amplio enfoca riba concientisacion, educacion y guia paso pa paso pa incorpora negoshinan den sistema formal. E meta ta pa amplia e base tributario mediante incentivo, na lugar di depende solamente di presion pa cumpli ley y reglamentonan.
- Movilisacion y acercamento na diferente instancia: A manda carta oficial cu plan pa formalisa negoshi na diferente entidad publico y priva, incluyendo Departamento di Asunto Economico, Comercio y Industria (DEZHI), Departamento di Impuesto (DIMP), Departamento di Labor (DAO), Departamento di Integracion y Maneho di Adherente (DIMAS), Sociale Verzekeringsbank (SVb Aruba), Qredits Aruba, banconan local (ABA), asociacionnan comercial (AHATA, ATIA, CUA, AFBA, AVA), partnernan den medio di comunicacion y firmanan di asesoria legal y contabilidad.
- Vodcast Educativo y Campania den Medio di Comunicacion: Ta introduci un serie di vodcast educativo cu historia di exito di empresarionan, splicacion di diferente incentivo fiscal y contenido pa desmenti mito riba medio social (Mi lo tin di paga mas impuesto di berdad?). Ademas, un campaña di video dedica na comparacion di diferente forma legal di negoshi (VBA versus Eenmanszaak) lo pone enfasis riba proteccion di patrimonio personal.
Iniciativanan cu ta sigui den plan
- Guia pa Formalisacion y Incorporacion di Negoshi: Publicacion di un guia practico, paso pa paso, pa empresarionan. E guia lo cubri apertura di cuenta bancario, registro na DIMP/DEZHI, afiliacion na SVb y fondo di pension, y configuracion basico di administracion financiero y contabilidad.
- Tayer Interactivo y Asistencia Directo: Organisacion di sesionnan practico pa guia empresarionan den e proceso di incorporacion, ofreciendo asistencia digital y presencial pa registro, como tambe guia pa cumpli cu obligacionnan despues di registro.
- Competencia Husto y Cooperacion cu Diferente Sector: Cooperacion cu instancia encarga cu supervision y cumplimento di ley pa impulsa inspeccion di mercado husto den sectornan informal specifico. Esakinan ta inclui benta online sin registro, tour informal, huur di estadia di cortico duracion sin permiso y trabou di construccion cu pago solamente na efectivo. Na mesun momento, lo promove e adopcion di pagonan sin efectivo (cashless payments) den colaboracion cu banconan local.