Koninkrijksrelaties ta bay traha dos “beleidsadviezen” pa Gabinete di Aruba  

ORANJESTAD (AAN): Durante un sesion na De Haagse Hogeschool a tuma lugar presentacion di dos “beleidsadviezen”

cu e grupo di studiantenan di Minor Koninkrijksrelaties lo bay traha ariba peticion di Gabinete di Aruba.

   E “beleidsadvies” nan ta uno riba e tereno di Communicacion y Marketing y e otro ta riba e tereno di exito di e studiantenan. Pa loke ta trata Communicacion y Marketing, e studiantenan lo mester skirbi un “beleidsadvies” cu ta dirigi na traha riba un plan di Communicacion y Marketing pa Gabinete di Minister Plenipotenciario di Aruba. Meta di e plan ta pa Gabinete di Aruba ta mas visibel y tambe drecha e profiel di Gabinete di Aruba bou pa actornan relevante tanto politico como di medionan di communicacion tanto na Hulanda como na Aruba.

   E di dos tema pa un “beleidsadvies” ta exito di e studiantenan, na unda e studiantenan lo mester bay traha riba con pa mehora exito di e studiante Arubiano na Hulanda. Meta di e conseho aki ta pa Gabinete di Minister Plenipotenciario di Aruba haya instrumentonan concreto cu lo por yuda nan na engrandese e exito di estudio y tambe e bienestar general di nos studiantenan.

   E programa a cuminsa cu un introduccion door di mr. Shandra John riba Statuut y tambe e vision, mision y tarea cardinal di Gabinete di Aruba.

  PR di Gabinete di Aruba Sidney Kock a duna un splicacion kico ta e rekisitonan pa e “beleidsadvies” Communicacion y Marketing y director di Gabinete di Aruba Joselin Croes LL.M/M.Sc. a haci esaki pa e “beleidsadvies” tocante exito di e studiantenan.

   E grupo di studiantenan di Minor Koninkrijksrelaties lo cuminsa awor cu nan tarea y ta proyecta pa nan entrega nan raport na februari 2025 na Minister Plenipotenciario di Aruba.

   Minister Plenipotenciario demisionario mr. Ady Thijsen a expresa di ta contento cu Minor Koninkrijksrelaties ta disponibel pa traha raportnan riba terenonan cu tin un balor adicional pa Gabinete di Aruba y tambe ta duna e studiantenan di e manera aki mas conocemento di e paisnan den Reino Hulandes y asina nan por duna un contribucion na procesonan cu ta beneficioso pa Gabinete di Aruba.  E potretnan ta pa cortesia di Arubahuis.