Amnesty International ta indica:
ORANJESTAD (AAN): Amnesty International a indica den nan rapport 'Sin proteccion
desvelando brechanan den e proteccion di venezolanonan na Aruba' cu a pesar di ta someti na e Convencion di Refugiadonan di Nacionnan Uni, Aruba falta legislacion specifico tocante di asilo, y esnan cu ta busca proteccion ta someti na e leynan comun di inmigracion.
Tampoco tin politica specifico dedica na mucha cu ta busca proteccion, loke ta pone cu mucha ta ser someti na e mesun proceduranan di asilo cu adultonan. Esnan cu kier busca asilo na Aruba por hacie di varios manera; pa medio di entrada regular na frontera, estando riba e isla ya caba, y na momento cu nan ta ser pone den un centro di detencion di inmigracion di GNC.
Debi na e hecho cu desde 2018 a pone restriccionnan di frontera cu ta preveni trafico aereo directo entre Venezuela y Aruba, venezolanonan mester yega Aruba pa via aereo a traves di otro paisnan, manera Colombia y Corsou.
Venezolanonan ta someti na rekisitonan di visa y otro documentacion pa drenta Aruba, loke pa mayoria di e venezolano ta dificil pa obtene na Venezuela.
Debi na e complicacionnan aki, tin hopi venezolano cu no ta mira otro opcion cu emprende un biahe peligroso via lama, poniendo nan bida na peliger, pa asina yega Aruba di manera iregular. Sin embargo, ta considera entrada iregular un violacion di e leynan local di Aruba, y p'esey ta entrega venezolanonan cu Kustwacht pa Reino hulandes den Caribe (en adelante: "wardacosta") ta intercepta na e autoridadnan local y ta detene nan automaticamente den e centro di detencion di inmigracion di Guarda Nos Costa (GNC) na Dakota, un bario di Oranjestad, capital di Aruba.
Na nan yegada, ta emiti un ordo di detencion dentro di un par di ora, ta confisca nan pertenencianan personal incluyendo telefon, y ta cera e detenidonan den cel. Dentro di 72 ora despues di e detencion, un hues ta revisa e caso pa dicidi si e detencion ta legal. Mientras nan ta den detencion, e venezolanonan tin e oportunidad di solicita asilo pa medio di funcionarionan di GNC.
E funcionarionan aki ta entrega e solicitud na e autoridad di inmigracion, e Departamento di Integracion, Maneho y Admision di Stranhero (DIMAS). E persona ta keda den detencion te ora cu DIMAS dicidi tocante di nan solicitud di asilo. Si e persona por provee un garante, nan por wordo libera cu e deber di presenta tres biaha pa siman na e centro di detencion di GNC, segun Amnesty International.
