Koningin Wilhelmina Fonds Aruba a presenta su website nobo

ORANJESTAD (AAN): Den cuadro di e celebracion di 60 aña di existencia KWF Aruba a dicidi di update nan website

y pone mas informacion accesibel pa comunidad. Alabes a cambia e adres di e website pa un nomber mas accesibel pa publico cual a bira www.kwfaruba.org.

Riba e website lo bo haya informacion general di e fundacion. Tambe a pone copia di foyetonan cu mas ta wordo pidi door di publico. E intencion ta pa bay pone mas foyeto y brochure online ya asina ora hende mester di informacion nan por haya esaki facilmente y por print esaki tambe pa nan por lesa den tur trankilidad.

            Tin tambe un seccion cu consehonan practico riba diferente tipo di cancer y tips riba un bida saludabel cu suficiente moveshon. Na mes momento por haya informacion over di Wereld Kanker Onderzoeks Fonds cu ta e instancia cu ta haci investigacion riba cancer na Hulanda y cu tin bon cooperacion cu KWF Aruba.

            Alabes por haya informacion di e servicionan cu KWF Aruba ta brinda na comunidad cualnan ta entre otro cuido na cas pa pashentnan cu cancer terminal, guia pa damanan cu mester di prothese y tambe por haya BH y transporte pa ora di bai tratamento di cancer na Oncologie, Specialista y radiotheapie.

KWF Aruba no ta haya ningun clase di subsidio y ta depende di e sosten di comunidad pa por sigui eherce su trabaonan. Pa e motibo aki ta tene e colecta anual den lunanan di april y mei.          Riba e website a añadi informacion di nan cuentanan di banco pa personanan cu lo kier haci donacion. Tin posibilidad tambe pa scan e QR code di Koningin Wilhelmina Fonds pa asina haci donacion via pay.aw.

Por ultimo a pone link cu nan social media cual ta entre otro nos facebook page Koningin Wilhelmina Fonds Aruba pa asina comunidad por keda al tanto di tur ultimo desaroyo di e fundacion.

E luna aki tin e colecta anual ainda andando y riba nos facebook page por mira unda e voluntarionan ta para si bo ta riba caminda y kier haci un aporte pa e fundacion por sigui informa y educa comunidad.

Pa mas informacion por pasa na nos Centro di Informacion na Spinozastraat 9, net patras di e Watertoren na Oranjestad.