WILLEMSTAD: E anuncio a yega manera un baño di awa frieu. KLM su main office na Hulanda, a tuma e decision drastico, cu debi na problemanan cu ainda tin na Schiphol, a opta pa elimina e plan di haci 2 vuelo pa dia pa Curaçao.
Pues awor Curaçao ta keda cu 1 solo vuelo pa dia di Amsterdam pa Curaçao y vice-versa. E informe aki a pone cu Gobierno di Curaçao yama reunionnan urgente, como cu e lo bay ta un golpi duro pa e isla.
Ministro di Desaroyo Economico na Willemstad a bisa cu e decision aki di KLM nifica cu nan lo bay tin perdida di mas di 20 miyon Euro.
Tabata luna pasa (September) cu KLM a anuncia cu na fin di October te cu Maart 2023, nan lo bay ta bulando 10 biaha pa siman riba e ruta pa Curaçao. Pero awor nan a baha esaki bek na 1 vuelo pa dia, y ta tira tur culpa riba e problemanan na Schiphol.
Matematicamente esey nifica cu Curaçao den e periodo ey lo haya 36.000 turista menos.
E siman aki mes, Prome Ministro Gilmar Pisas hunto cu Ministro di Desaroyo Economico Ruisandro Cijntje, a reuni cu algun gremio, incluyendo CAP, VBC, CHATA, y tambe KvK riba e asunto aki.
E reunion tabata den cuadro di decision cu KLM a tuma pa reduci su vuelonan pa Curaçao den un forma repentino y sin anticipacion.
Segun Willemstad, nan lo bay traha hunto cu tur esnan concerni pa yega na un solucion mas pronto posible pa e situacion inespera aki. No a bisa nada si acaso Curaçao lo bay papia cu e asunto aki cu Mark Rutte na Hulanda.
Di otro banda, Ministro Cijntje a propone e idea pa check si e otro aerolineanan manera Tui y tambe Air Belgium lo por bula cu mas frequencia y cu avionnan mas grandi. Tambe Curaçao kier check si por organiza algun charter for di Aeropuerto di Eindhoven of di Rotterdam pa bula pa Caribe, pa reduci e golpi un poco.
