SANTO DOMINGO: E cantante venezolano, Lele Pons a wordo opera di emergencia.
Via di su stories na Instagram, el a post potret na Hospital unda cu el a wordo hospitaliza pa nan opera y kita su apendix mesora.
Su publicista Manuel Vera a bisa revista People en Español cu ora cu docternan a samina su dolor, nan a mira cu tin di opera su apendix mesora. Pues eynan el a keda cu su mama, su tata, y su pareha Guaynaa.
Lele Pons a cuminza haya dolor, y pesey nan tres a hibe pa Hospital unda el a keda interna pa wordo opera.
“Mi ta hopi agradecido pa mi bida. Awe nan a kita mi apendix, via un operacion chikito cu recuperacion rapido. Mi ta feliz di ta rondona pa hendenan cu mi stima,” Lele Pons a skirbi riba e post di Instagram stories.
Riba e potretnan cu el a comparti, por mire drumi riba cama mientras su pareha ta dune un sunchi. Un otro potret ta mustra su mama den background despues di e operacion.
E influencer a splica cu e operacion aki ta unda cu docternan ta saca e apendix ora cu esaki ta inflama. El a bisa cu djis aki algun dia e lo ta bek riba pia.
Lele Pons di Venezuela, y Guaynaa (cantante di Puerto Rico) a compromete durante un concierto na Augustus ora cu nan a divulga cu nan tin un noviazgo di mas di un aña caba.
“Esaki ta mi pareha bunita Lele Pons, y mi kier a haci’e un pregunta: Bo kier casa cu mi?,” Guaynaa a puntra. Despues el a bay na rudia y a saca un caha di renchi.
E hoben di 24 aña a tuma microfon y a contesta: “Claro cu si”, y lagrimanan a cuminza core riba su cara. E pareha a seya e compromiso cu un braza y sunchi.
