Armando Goedgedrag a demostra su talentonan den su prome Solo Expo

ORANJESTAD (AAN):  Durante e fin di siman, Aruba a bisti su mes di gala na momento cu Armando Goedgedrag a demostra su talentonan den su prome Solo Expo, den ArtisA Gallery na San Nicolas.

            Un soño cu a bira realidad. Desde chikito e artista Armando a soña cu un dia e lo tin tur loke e ta aspira, mira y kier protega, pinta riba canvas grandi. Anochinan sumamente emotivo yena di emocion na unda esunnan cu a respalda Armando durante dos anochi.

            E prome anochi tabata exitoso y aki ya 7 di 10 obra a troca cas y lo haya nan develacion riba un muraya cerca un propietario nobo y orguyoso. E di dos, mas aun aki e dos aboranan mas grandi tambe a sa di capta atencion y curazon y a haya nan propietario.

            Armando a describi cada pintura desvelando un pa un contando e publico su sentimentonan y tur loke e ta desfila riba e canvass.

            E pintura Aprecia ta describi un flor di kibrahacha cu ta floria solamente dos bez pa anja, algo cu un persona no por keda sin mira. Den nos bida nos ta experimenta diferente momentonan cu ta di corto duracion, algo cu nos mester admira y aprecia.

            Flotando scondi cu describi un shoco cu ta e simbolo nacional riba e canvass capta den un movecion unico na unda e ta habri su halanan.

            Lanta Ariba ta e descripcion di su amor pa lama. E buniteza cu ta rondona nos isla den su colornan y textura. Tin bez calmo y otro cu un forza indiscutible. E pintura ta wordo yama Turqua cu ta forma tur colornan den blauw.

            Crecemento ta e Prikichinan, Aruba su parha nacional. Tur nan colornan ta wordo desvela mientras nan ta subi nan partida. Durante nos bida tur di nos ta encontra momentonan cu ta duna nos un chance pa crese, p’asina nos por braza e siguiente episodio den nos bida.

            Pluma di Oro ta un creacion impresionante. Hummingbirds of e blenchi por ser haya tur caminda pero no den e color excepcional cu ta wordo yama Dornasol. Una beyeza den colornan oro, corra y berde.

            Otro Oportunidad, ta e biahe di e turtuga cu ta sumergi cada bez pa haya aire y asina haya un oportunidad mas di bida. Cada bez enfrentando e peligernan pa nan mesun bida. E pintura Armando ta dedica na tur e tortuganan cu a wordo maltrata, a perde nan bida dor di impactonan na momento cu e sumergi pa aire. Un di su pasionan e conservacion di e animal aki.

            Preserverancia, un descripcion di e trupial y su dadel. Ni maske cuanto espina tin riba e dadel e trupial semper ta haya e forma pa yega cu pasenshi y dedicacion na e fruta.

            Lagami Floria, E pintura aki ta parti di e exposicion di Pan Expo na Ateliers’89. Durante e pandemia di covid, nos e precibi masha hopi cambio, un di nan cu ta di aprecia sigur ta e oportunidad cu naturaleza a haya pa hala rosea y floria.

            Arco, Desde e colapso di Natural Bridge, Aruba a perde un di su joyanan principal. Loke poco di nos sa cu tin mucho mas di e joyanan aki scondi na nos costanan. Un sigur, ta e Arco cu ta un desvelo di colornan na momento cu solo subi y ora e baha cambiando di color na cada instante.

            Un danki ta bay na Unoca, Prins Bernard Cultuur Caribe y ArtisA. Awor, Armando Goedgedrag ta prepara su mes pa pinta un muraya di mas cu 5 meter durante Aruba Art Fair. Algo sigur cu lo laga un estampa atras di un sensibilidad cu masha poco artista sa di desvela.