Kiwanis Club of San Nicolas cu exitoso evento di ‘Smile Drive’

ORANJESTAD (AAN): Recientemente Kiwanis Club of San Nicolas a tene su prome edicion di e asina yama “Smile Drive”.

   Cu asistencia di 4 dentista, un total di 52 mucha a worde invita pa bin drecha nan djente, pa asina por ricibi nan “saneringsbrief”. Cu esaki, e muchanan lo ricibi nan prome limpieza general dentro di 6 luna y cobertura di nan cuido dental durante e siguiente añanan.

   E expectativa tabata cu algun mucha a yora, of lo tabata tin miedo, sin embargo nan a sorprende tur e adultonan cu nan balentia. Tur mucha a sali cu un sonrisa y cla pa cuida nan dientenan tur dia.

   Nos kier a gradici Hernandez Dental Care enormemente pa kere den e proyecto aki y habri e porta di nan praktijk pa e muchanan, como tambe Dr. Marvin v/d Linde & Dr. Michella Rasmijn. En particular, nos kier a gradici Dr. Johnny Hernandez pa su iniciativa, esfuerzo, entusiasmo y sosten pa cu e proyecto aki.

Ademas kier a gradici cada un persona den comunidad cu a cumpra un Smile Drive Tumbler pa colabora cu e gastonan envolvi.

   Tur mucha tambe a ricibi un regalo di Colgate pa asina nan sigui mantene nan diente bon cuida.

   Kiwanis Club of San Nicolas ta spera di por sigui haci e bunita proyecto aki den futuro cu colaboracion di mas dentista riba nos isla. Di e forma aki nos por sigui pone un bunita sonrisa riba cara di nos muchanan, cual tur mucha na Aruba merece.

  Si bo persona ta desea di contribui cu e proyecto aki, pa medio di compra di bo Smile Drive tumbler, esaki por ainda (cantidad ta limita) por medio di nan Facebook page of un di nos miembro nan .