Kiwanis Club of Palm Beach su di 24 Carnaval Masquerade Party 100% ta bay bek den comunidad

ORANJESTAD (AAN):  Diabierna 17 di februari, 2023 Kiwanis Club of Palm Beach a tene su di 24 Carnaval Masquerade Charity Party den Renaissance Convention Center.

           E carchi tawata tin un balor di AWG 500.00 pa pareha caminda tur fondo recauda ta bai 100% bek den comunidad.

            E presidente actual di Kiwanis Club of of Palm Beach, Daniel Aguirre, a sigura cu muchanan mester di hopi cuido y ayudo. Kiwanis Club of Palm Beach ta sostene, entre otro Neptali Henriquez Park, pero tambe e programanan manera Terrific Kids, Builders Club, cu awor ta activo na varios scol, Circle K activo na Universidad di Aruba, e programa StimaMI GuiaMi, Back to School conhuntamente cu otro clubnan di Kiwanis.

            Banda di e proyectonan aki, tambe ta haci donacionnan regular manera Water coolers pa scolnan, e campaña di conscientisacion rond di Car Child-Seat. Ademas ta haci donacion na CEDE Aruba, Hungateca, YMCA, Casa Cuna, Buki di Pret, Jump 18th program y otronan, pa menciona algun.

            E bandanan durante e Masquerade Party tawata Tsunami, ‘N Fuzion, Robert Jeandor y su Solo Banda Show, Musical Time y como sorpresa Ataniro y su banda.

            E Masquerade Party tabata un fiesta open premium bar, premium snacks y sopi, locual e fiesta sa di ofrece caba. Y sin lubida, door prizes y premio pa e miho disfrasnan pa asina mantene e ambiente y duna tambe algo bek na e contribuyentenan.