'Healthy Lifestyle Center' a wordo inaugura den e edificio di IBiSA

Minister Dangui Oduber

ORANJESTAD (AAN): Diahuebs atardi, minister di Turismo y Salud Publico, sr. Dangui Oduber conhuntamente cu Minister President Sr. Evelyn Wever – Croes y director di AZV, Edwin Jacobs, a hiba palabra na e apertura di e Healthy Lifestyle Center, situa den e edificio di IBiSA na Frankrijkstraat.        Healthy Lifestyle Center ta un proyecto den cuadro di e maneho cu tin prevencion poni como punto central. E centro aki ta un colaboracion entre Ministerio di Salud, AZV y Departamento di Salud Publico (DVG).

            E meta di e centro aki ta pa yuda nos comunidad yega na un estilo di bida mas saludabel y activo. E Healthy Lifestyle Center ta habri pa ful comunidad por acudi na dje di manera gratis. E centro aki tin dos dietista cu ta esnan principal cu lo atende cualkier persona cu tin necesidad den tips y guia nutritivo. Apart di e dos dietista nan aki, tambe lo ofrece programanan den grupo of individual cu e guia di un sportsinstructeur.

            E vision principal ta pa purba di reduci gastonan den cuido medico den futuro, por medio di cambia nos estilo di bida den presente. Aruba tin un perecentahe halto di nos comunidad cu ta sufri di malesnan cronico of cu ta den e fase pa desaroya esaki. E Healthy Lifestyle Center kier purba reduci e cantidad di personanan den nos comunidad cu ta sufri di e malesnan aki.

            E parti mas bunita di e proyecto aki ta cu e ta habri pa ful comunidad por pasa y busca tips y guia. Cualkier persona cu ta interesa por pasa libremente na Frankrijkstraat 1, den e edificio di Ibisa, pa hasi un cita. Pronto nos lo duna mas informacion tocante diferente programa y actividad cu lo tuma lugar.
            E meta ta pa Aruba yega na un calidad di cuido mas eficiente, mas efectivo y mucho mas sostenibel.

            Minister sr. Dangui Oduber kier gradici AZV na prome lugar, pa e cooperacion pa hasi un proyecto asina bunita realidad. Tambe e ta gradici PAHO conhuntamente cu Departamento di Salud Publico y e stuurgroep Nacional di NCD’s, kende ta traha continuamente pa mehora calidad di salud na Aruba, y pa sostene e proyecto aki. Henter pueblo di Aruba ta keda invita pa pasa na Frankrijkstraat (gebouw di IBiSA) y hasi bo cita pa check bo salud.