Kiwanis Club of Palm Beach a lansa e di 27 edicion di e Masquerade Party

ORANJESTAD (AAN): Recientemente den cafetaria di Aruba Bank na Camacuri, Kiwanis Club of Palm Beach, acompaña pa algun “stakeholder” importante,

a anuncia e di 27 edicion di e “Kiwanis Palm Beach Masquerade Party”, un “fundraising” organiza den forma di un fiesta cu un solo proposito: recauda fondo pa por sigui contribui na nos comunidad, specialmente nos muchanan. 

   E historia di nos Masquerade Party ta mas cu un fiesta; e ta un historia cu un impacto profundo den nos comunidad. Pa e edicion aki, nos ta gradici Aruba Bank pa duna oido na nos yamada, cu ta demostra cu nan ta kere den y sostene nos mision pa yuda nos comunidad. E biaha aki e tema di e fiesta ta “RenAIssance — The Fusion of Past and Future.” Un fusion di e pasado y futuro, den cual lo combina historia cu inovacion pa un experiencia inolvidabel. E bandanan cu lo entretene e anochi ta: Robert y su Solo Banda Show, N’Fuzion, y Tsunami, cu lo pone tur esnan cu atende e fiesta pasa un anochi inolvidabel. Y manera semper, tin sorpresa!

  E fiesta lo tuma luga dia 6 di februari y ta cuminsa 9:00 PM den Renaissance Convention Center. E contribucion (ticket) ta 500 Florin pa dos persona, all-inclusive, cu ta premium bar, finger food, sopi y oportunidad pa gana premionan spectacular na porta, entre otro: pa e miho disfras. E detaye mas importante: 100% di locual wordo recauda ta bay bek den comunidad.

   E fondo ta bay yuda programa y proyectonan cu ta beneficia nos muchanan. Entre nan:

Concientizacion pa uso di Child-Seats: Un proyecto cu Kiwanis Palm Beach ta ehecuta den colaboracion cu Wit Gele Kruis, den cual – banda di ta reparti ‘Child-Seats” na famianan cu menos recurso, cu e obhetivo: seguridad di nos muchanan den trafico – ta conduci programanan di concientizacion tambe, entre otro ariba nos Paginanan di Media Social.

   StimAmi GuiAmi: Un programa educativo den colaboracion cu Fundacion pa Nos Muchanan, cu ta enfoca ariba educacion di mayornan, cu e obhetivo pa mehora e comunicacion (laso) entre mayor y yiu, specialmente den e prome añanan (0 pa 4) di e mucha.

   Invest in Me: Un proyecto cu ta enfoca riba educacion financiero – con pa maneha placa – specialmente pa nos muchanan.

   Finalmente, nan “Service Leadership Programs” den varios scolnan, entre otro Terrific Kids cu ta activo den 5 scol basico, Kiwanis Builders Club den 2 scol Secundario (MAVO), y Kiwanis Circle-K na Universidad di Aruba.

   E programanan aki, ta enfoca ariba desaroya muchanan y hobennan den diferente topico y dimension, entre otro: Amor Propio, Desaroyo di Caracter, Traha den Ekipo, pero en especial Liderazgo.

   Tur esakinan y mas lo no ta posibel sin bo contribucion. Nos ta gradici tur contribuidor di e ultimo 26 edicion y nos ta spera di mira’bo atrobe dia 6 di februari den e Renaissance Convention Center! Y si nunca bo no a presencia e fiesta aki, esaki ta bo oportunidad pa experencia e fiesta mas gusta di aña. Tuma contacto cu un miembro di Kiwanis Club of Palm Beach, cana e proceso di reservacion di bo ticket, pa asina no perde e fiesta cu mas ambiente di aña, cu ta dunabo e oportunidad pa disfruta hunto cu amigonan, conocirnan y familiar, y alavez contribui na un bon causa.

   Kiwanis Internacional ta un organizacion caritativo mundial, dedica na haci nos mundo mihor door di cambia un comunidad of un mucha cada bes.