ORANJESTAD (AAN): Recientemente Kiwanis Club of Palm Beach Aruba a instala su directiva nobo pa e aña 2026-2027.
E instalacion a wordo conduci door di Lieutenant Governor (LG), esta Endrah Richardson Gumbs, cu por cierto ta un miembro di Kiwanis Club of San Nicolas, cu a haci e anochi ainda mas special.
Durante e anochi aki, club a duna un reconocemento na Egbert Frigerio pa su lealtad y dedicacion, siendo miembro di e club for di su fundacion, 42 aña pasa. Evan Giel, tawata e miembro encarga cu e tarea importante di maestro di ceremonia pa e anochi special aki.
E directiva nobo di Kiwanis Club of Palm Beach pa e aña 2026-2027 ta consisti di e siguiente boluntarionan:
President ta Christopher “Chris” Robles. Secretary ta Rodney Kock. Treasurer ta Joshua Arrindell. President Elect ta Roël Gomez. Vice President ta Glennrick Ridderstap. Immediate Past President ta Michel Frank.
Como Directornan tin Giandric Tromp, Dennis Evers, Rothmar Coenraad, Jomar Benschop, Navin Gangaram Panday, Randolph Ruiz, y Paul Seute.
Past LG Rothmar Coenraad tabata encarga cu e tradicional “Salute to the the Ladies”, caminda a enfoca riba e rol y importancia di e hende muhe den nos bida y trabou boluntario.
“Destitucion” di directiva 2024-2025 y instalacion di directiva 2025-2026
Tawata un honor pa tin un LG, cu alabes ta un miembro activo di Kiwanis Club of San Nicolas, dirigi e aspecto ceremonial di “Destitucion” di e directiva saliente, pa despues instala e directiva nobo pa 2026-2027.
Como Presidente nobo pa e aña 2026-2027 a keda instala Christopher “Chris” Robles, conoci como escritor di e buki di mucha “Cabri e Cabrito”y empleado di Setar N.V.. E palabra central di e Presidente nobo pa e aña aki ta “Impact”. E enfasis lo ta no solamente riba cantidad di proyecto cu club ta realisa, sino specialmente riba cuanto mucha nos ta logra impacta positivamente den nos comunidad. Como parti di su vision, Presidente a introduci su projecto nobo “Lesa cu Mi”, den colaboracion cu Biblioteca Nacional Aruba. Cu e proyecto aki, Kiwanis Club of Palm Beach lo bishita diferente Centro di Barionan pa lesa hunto cu muchanan y instala biblioteca chikito, completamente patrocina pa e club, pa stimula lesamento, educacion y imaginacion.
“No ta solamente kico nos ta haci, sino cuanto mucha nos ta impacta.” E gran evento aki a tuma lugar na ballroom di Embassy Suites by Hilton durante un cena ameno cu presencia di varios otro organisacion di servicio na Aruba y colaboradonan y socionan importante di y pa Kiwanis Club of Palm Beach. Kiwanis International ta un organizacion caritativo mundial, dedica na haci nos mundo mihor door di cambia un comunidad of un mucha cada bes.
