ORANJESTAD (AAN): Cu hopi alegria y entusiasmo, Aruba Bank ta orguyoso di habri e temporada di Carnaval 73
apoyando dos grupo di carnaval di mucha, Unity Carnaval Group y Centro di Bario Noord, cu un contribucion di 10.000 Florin na cada grupo.
Cu e sosten aki, Aruba Bank kier contribui na participacion di nos muchanan den un di e celebracionnan cultural mas importante di Aruba.
Carnaval ta mas cu musica, baile y color; e ta un tradicion cu ta uni nos comunidad, stimula creatividad y ta duna nos muchanan e oportunidad di forma parti di nos herencia cultural.
E iniciativa aki ta forma parti di nos pilar strategico “We Care”, cu ta refleha e compromiso di Aruba Bank pa contribui positivamente na bienestar di nos comunidad.
Door di sostene iniciativanan cultural y social, nos ta sigui inverti den oportunidadnan cu ta fortalece nos comunidad y promove participacion di nos generacionnan futuro.
Aruba Bank ta felicita Unity Carnaval Group y Centro di Bario Noord cu e trabao y dedicacion cu nan ta pone den organizacion di nan gruponan di mucha. Nos ta desea tur participante, organizador y boluntario un temporada di Carnaval 73 exitoso, yen di alegria, creatividad y hopi ambiente.
Hunto nos ta celebra nos cultura, nos tradicion y nos Carnaval 73.
