Kiwanis Club of Palm Beach a instala su directiva nobo

ORANJESTAD (AAN): Recientemente Kiwanis Club of Palm Beach Aruba a instala su directiva nobo pa e aña 2025-2026.

E instalacion a worde conduci door di Lieutenant Governor, Rothmar Coenraad, cu por cierto ta un miembro di Kiwanis Club of Palm Beach, cu a haci e anochi ainda mas special.

   Dennis Evers, tabata e miembro encarga cu e tarea importante di maestro di ceremonia pa e anochi special aki. E directiva nobo di Kiwanis Club of Palm Beach pa e aña 2025-2026 ta consisti di e

siguiente boluntarionan:

   Funcion den Board Boluntario: President ta Michel Frank, Secretario ta Rodney Kock, Tesorero ta Navin Gangaram Panday, President Elect ta Roël Gomez.  Vice President ta Christopher Robles.  Immediate Past President ta Ross Brezovar.

   Directornan ta Giandric Tromp, Dennis Evers, Joshua Arrindell, Glennrick Ridderstap, Patrick Melchiors, Randolph Ruiz, y Alvin Wever.

   Despues cu e Presidente saliente, Ross Brezovar, a habri e anochi y reunion ceremonial, a sigui di biaha cu canto di nos Himno Nacional. Robert Jan Moons a haci e “invocation”, un reflexion pa asina pone e tono positivo y di hermandad pa cu e evento sumamente special aki. Siguientemente, pa recorda tur miembro y invitadonan presente, Jomar Benschop y Paul Suete, a lesa e obhetivonan di Kiwanis International, cu ta e principio y balornan fundamental di Kiwanis.

   Pa cera e prome parti di e anochi, Glennrick Ridderstap tabata encarga cu e tradicional “Salute to the the Ladies”, caminda a enfoca riba e rol y importancia di e hende muhe den nos bida y trabao boluntario.

   Discurso di Ross Brezovar: E Presidente saliente a splica, cu locual ta importante den trabao boluntario, ta no solamente bo mester tin e tempo, sino mas bien mester tin e curason, pa cu esaki. Cu esaki e kier a inspira esnan presente pa pone tur nan energia pa duna e ayudo cu nos comunidad mester, y asina yuda nos isla progresa di e mihor manera posibel.

   Discurso Rothmar Coenraad: Lieutenant Governor Rothmar, a cuminsa ta bisa cu titulo no ta traha lider, pero servicio. Lidera, ta cuminsa hopi mas prome cu drenta cualkier posicion. Bo ta bira un lider, na momento cu bo bisa “Si” na duna bo tempo, bo talento y bo curason. Porta bo no a realisa esey ainda, pero e simpel hecho cu bo a opta pa haci trabao boluntario, ta ponebo den un ambito diferente caba.

   Tabata un honor pa tin un Lieutenant Governor, kende alavez ta un miembro activo di Kiwanis Club of Palm Beach, dirigi e aspecto ceremonial di “Destitucion” di e directiva saliente, pa despues instala e directiva nobo pa 2025-2026. Esaki a bay den hopi bon ambiente, caminda e Rothmar a tuma su tempo pa resalta un atributo special di cada miembro cu a asumi un posicion den e directiva nobo.

   Discurso di Presidente Michel Frank: Como Presidente nobo pa e aña 2025-2026 a keda instala Michel Frank, conoci como propietario di e marca “Aruba Heat” y studiante na Universidad di Aruba, haciendo su Master na e programa di SISSTEM. E Presidente na su turno a desvia for di tradicion, pues no a duna un discurso manera ta costumber, pero a opta pa yama tur e miembronan cu ta encarga cu un comision, y dunanan un “danki” special pa acepta e encargo menciona. E Presidente nobo a haci uso di e momento special aki, pa presenta su “Signature Project”, cu ta un parke infantil (speeltuin) inclusivo, specialmente pa personan cu limitacion, cu a conta cu acceptacion di tur esnan presente, y cual sigur lo bay ta un proyecto cu impacto sumamente positivo pa e isla di Aruba. Mas tocante e proyecto aki, lo worde comunica na e miembresia y e comunidad di Aruba durante transcurso di e aña Kiwanistico 2025-2026.

   E gran evento aki a tuma lugar na Aruba Mariott Resort & Stellaris Casino durante un cena ameno cu presencia di varios otro organizacion di servicio na Aruba y colaboradonan y socionan importante di y pa Kiwanis Club of Palm Beach. Kiwanis International ta un organizacion caritativo mundial, dedica na haci nos mundo mihor door di cambia un comunidad of un mucha cada bes.