ORANJESTAD (AAN): E organizacion di Pan American Health Organization (PAHO)
a confirma cu nan ta mandando articulonan medico di emergencia pa Jamaica y Cuba, cu a wordo afecta pa Horcan Melissa.
A manda ya mas di 2.6 ton di articulo pa Cuba, y nan tin 5.5 ton adicional cla pa Jamaica asina cu e Aeropuerto den e region ey na Jamaica habri bek.
E cargamento cu ya a wordo manda pa Cuba for di e deposito strategico di PAHO cu tin na Panama. Den cargamento pa Cuba el a inclui nuebe kit di emergencia cu remedi, articulo medico, y pa cirugia, cu ta suficiente pa atende 5.000 hende den tres luna. Tambe a manda tablet di cloro pa trata casi 8 miyon liter di awa, ekipo electrico, rugtas medico, tent, y tankinan pa warda awa, cu ta entre e materialnan di prioridad.
E cargamento a wordo hiba bao di mecanismo di accion di United Nations Central Emergency Response Fund (CERF). E articulonan ta wordo manda pa e areanan mas afecta di parti oost di Cuba, unavez cu e comunicacion via tera wordo restaura.
E cargamento cu ta bayendo pa Jamaica, ta sali tambe di Panama. E ta contene material cu ta suficiente pa atende 10.000 hende pa 3 luna, kit di emergencia pa cirugia pa 50 pashent, 50 rugtas medico, tent, tankinan di warda awa, 300 net contra sangura, y hopi mas.
