Kiwanis Club of Aruba a yama bon bini na su directiva nobo

ORANJESTAD (AAN): Recientemente Kiwanis Club of Aruba (KCA) a yama bon bini na su directiva nobo cu ta encarga cu lidera e club pa e aña Kiwanistico venidero.

   Presidente actual Jokoeza Hooplot ta sigui den su funcion y por conta riba Presidente Electo Ingmar Ramharakh y Vice-Presidente Tracey Werleman. Ralitza Werleman ta fungi como Secretario, y Christopher Braam ta e Tesorero di directiva. Norma Brinkenberg ta sigui den e directiva como “Immediate Past President”. Pa e aña Kiwanistico 2022-2023 e Directornan ta: Indra Pereira, Tessely Koolman, Vikash Karnani y Zarianni Larmonie.

   E anochi di instalacion di e directiva nobo tabata uno exitoso danki na e miembronan cu a organiza e evento den un tremendo ambiente cubano, y danki tambe na e maestronan di ceremonia: Ebby Schwengle y Aurienne Krozendijk. E miembronan di e club y invitadonan a reuni hunto pa asina mustra gratidud na e directiva anterior pa nan servicio, y despues a duna un bon bini na e directiva nobo cu a worde instala oficialmente door di Vice-Gobernador Marelva Corion. Durante e anochi, 3 miembro di KCA a worde reconoci door di Presidente Jokoeza pa nan dedicacion y liderazgo excepcional na e club, cual ta Vikash Karnani y Jane Wever cu a haya e titulo di “Rookies of the Year”, y Indra Pereira cu merecidamente a ricibi e honor di e “President’s Award”.

   Den e aña 2021-2022, KCA a haci donacion na varios organizacionnan local, manera Fundacion Ban Uni Man pa Cria Nos Muchanan, cu ta percura pa muchanan di menos recurso ricibi un desayuno na scol; Fundacion Hungateca, cu ta fungi como un ‘speel-o-theek’ y alavez ta organiza speeldagen educativo; y mas organizacionnan non-profit.

   KCA a organiza diferente proyecto di servicio durante e aña pa e bienestar di nos muchanan y nos comunidad. Ehempelnan di esaki ta: Kiwanis One Day, Universal Children’s Day, Pasco den Bario, Clint Whitfield Outstanding Student Awards, y hopi mas. Por siña mas tocante e club y tur e proyectonan servicial cu nan ta organiza regularmente door di bishita www.kiwanisclubofaruba.org.

   E club kier gradici e miembronan di e directiva anterior cu a baha for di nan puesto y a duna nan dedicacion, tempo y guia na e club pa e aña cu a pasa: Manaaf Badloe, Gay Spellen, Daniel Driessen, Claudine Ho-Kang-You y Nathalie van der Linde.