ORANJESTAD (AAN): Ronella Croes, CEO di Oficina di Turismo a duna di conoce cu pa loke ta e porcentahe di vacunacion local
pa por suavisa e medidanan pa e turistanan cu ta bishita Aruba vacuna caba, esey ta algo cu ta den man di e autoridadnan concerni.
El a splica cu aworaki ta papiando di 70%. Esey ta e ultimo 'feedback' cu ATA a haya. Esey ta e meta pa Aruba na e momentonan aki.
Croes a bisa tambe cu mayoria di e bishitantenan ta indica cu nan ta completamente vacuna y nan tambe ta puntrando pakico nan tin cu cumpli cu cierto medidanan.
El a indica cu e implementacion di e guia di CDC di Merca, cu si bo ta full vacuna bo no tin cu uza e tapaboca, e implementacion di esey a wordo laga den man di cada estado. Por mira cu algun estado ta implement'e y otronan manera New York, cu ta un di e mercadonan clave di Aruba a indica cu ainda nan no ta bay move den e direccion ey, a remarca.
Cada estado ta implement'e conforme nan mesun situacion y ta tuma e decision. Otro aspecto pa tene na cuenta ta e hecho cu pa Aruba ta importante ta e transporte aereo. Y akinan a indica cu e tapaboca ta keda aplicabel.
Aruba ta sigui tur e tendencianan ey y conforme e pais for di unda e bisitantenan ta bin flexibilisa, e preguntanan ta bira mas na ATA di parti di e bishitantenan dicon si na nan pais nan no tin cu haci esey pero na Aruba si, Ronella Croes a splica.
E contesta cu ta haya na Aruba ta cu tin cu purba di incrementa e grado di vacunacion un tiki mas ainda ohala yegando e 70% pa asina por sigui flexibilisa y por papia di entre otro elimina e parti di tapaboca conforme cierto manehonan, e CEO di ATA indica.
Esey ta e preguntanan cu ta bin dilanti di parti di e bishitantenan mirando cu mayoria di nan ta completamente vacuna, a agrega.
