ORANJESTAD (AAN): Informacion for di Hulanda ta indica cu e fundacion educativo ‘WeConnect’ y e departamento di Enseñanza di Arubahuis,
a ofrece un reunion digital encuanto kico pa escoge pa estudio avanza den Cuido. Esaki ta specialmente pa alumnonan di MBO 3 y 4 di Colegio EPI afdeling Verpleegkunde.
E studiantenan a mantene un combersacion virtual cu studiantenan di HBO cu ya ta studia of traha na Hulanda. E reunion digital gratis aki a ser teni Diaranson via e plataforma Zoom.
E website di United Care Caribbean, cu a wordo desaroya pa WeConnect, a wordo presenta tambe na e studiantenan di EPI. E ta un herment pa facilita e decision ta ki estudio nan lo escoge den e sector di cuido na Hulanda.
NECESIDAD: Un bon informacion roba loke exactamente un estudio ta encera, ta importante pa e studiantenan e aña aki. Debi na e medidanan di Coronavirus, e distancia pa Hulanda ta parce mas leu, e ora con lo bo escoge si bo kier bay studia Verpleegkunde na Groningen, of kizas un educacion pa docente na Rotterdam?
“Nos tin bon experiencia cu informacion duna cara-pa-cara, esta cu studiantenan ta duna informacion directo! Esaki ta un bon complemento na e informacion di un institucion educativo,” segun Tanja Fraai a bisa, kende ta manager di WeConnect.
ENCUESTA: For di un encuesta chikito teni entre 40 studiante di seccion Verpleegkunde, ta sali na cla cu e escogencia pa un continuacion di na nivel HBO no ta algo facil. Un tercer di e studiantenan a mustra cu nan kier a keda na Aruba. Como 1/3 a escoge pa Hulanda. Y e otro tercer a indica cu ainda nan tin duda riba esey,.
E studiantenan a a indica cu nan kier sa mas di e costo di bida na Hulanda. “Nos anfitrionnan Jayrón, Zuriah, Kimberly, y Nathifa a conta di nan propio experiencia y a duna hopi tip practico. Nan ta haya cu ta valioso pa comparti e conocemento aki,” Tanja Fraai a bisa.
EXITO DI ESTUDIO: E meta di e webinar aki y tur otro actividad di WeConnect y Arubahuis ta pa promove e exito di e estudionan. E transicion di Aruba pa Hulanda ta grandi y pa algun studiante esey ta trece decepcion y hasta algun ta djis stop cu e estudio.
Aki e manager di WeConnect, Tanja Fraai a bisa: “Unavez cu nan ta na Hulanda, nos ta organiza encuentronan di red y excursion pa e studiantenan. Nos ta yuda nan sinti nan mes na cas den e comunidad Hulandes cu ta mas complica y individualista. Nan mester sinti nan mes cu ta wordo mira y scucha, y sa cu nan no tey nan so na Hulanda.”
BRAINDRAIN: E fundacion ta comprometi tambe pa cu regreso di profesionalnan Caribense pa nan mercado local. “Nos kier stop cu e braindrain y stimula e studiantenan bon educa pa nan regresa y traha na nan pais. Tin hopi mester di nan, sigur tambe den Cuido,” Tanja Fraai a indica.
