ORANJESTAD(AAN)—DIARIO a mira luz den turbulencia politico na Aruba. DIARIO a nace na momento cu Aruba
tabata den necesidad di un medio di comunicacion skirbi na su idioma y cu base na Aruba pa asina e pueblo di Aruba no depende di otro luga.
DIARIO tabata e medio di comunicacion di Aruba na momento cu e lucha di Status Aparte a culmina y DIARIO a mira con hamber pa poder a haci cu hustamente e partidonan cu tabata contra e lucha di Betico Croes y hasta contra e concepto di Status Aparte, a bula den e prome Gobierno di Aruba.
DIARIO tabata cas y boca di e Pueblo di Aruba y conoce sentimentonan, ansianan, deseonan di ciudadanonan, cu ta motibo di nos existencia pero tambe fuente di informacionnan cu nos ta trece dilanti como e matutino di Aruba.
E topiconan cu DIARIO ta trece dilanti na tur forma cu diferente tareanan cu periodismo conoce, a nace for di Pueblo di Aruba cu for di 2018 a exigi pa DIARIO bay den profundidad di loke a pasa y tabata pasa na Aruba.
Di e forma aki DIARIO a cuminsa cu investigacionnan pisa manera Pueblo di Aruba tabata exigi y cu a duna resultadonan grandi pa Aruba.
Investigacionnan di DIARIO a base di deseo di Aruba a rementa e falsedad di e proyecto Citgo, a cuminsa carga e proyecto historico di Bo Aruba den cual politica a wordo hunga cu un fondo di 1.6 Miljard, y a base di rapportnan a splica e falsedad politico mas grandi cu Aruba a conoce cu tabata e promesa di Mike Eman cu e ta deshaci di BBO pa asina e por a crea e debe nacional cu ta e monumento di abuso di placa di Pueblo.
Mientras 2021 tabata acerca, na forma constante nos a pidi pa instancianan oficial splica Pueblo di Aruba kico a pasa cu placa di Pueblo for di 2009, ya cu esaki ta e contesta mas importante cu Pueblo di Aruba kier ricibi a base di e debernan cu a keda atras pa generacionnan cu ta bini pa kita for di nan placa di cuminda pa paga debe cu Gobierno Mike Eman a laga atras.
Durante eleccion 2021 e huma di Citgo ta stroba Pueblo di Aruba hala rosea pa motibo di e resultadonan cu e tabata tin pa Aruba, cu a wordo ciego cu fantasia y mas fantasia, pa asina Gobierno di Mike Eman den combinacion di Nicolas Maduro por a haci bofon di Aruba.
Citgo ta un centro di crimen na Merca. Den Corte di Husticia na Merca, manera nos a presenta pa DIARIO, condena tabata cay pa loke tabata pasa den e murayanan di Citgo, cu e partner di Gobierno Mike Eman, Nicolas Maduro, segun autoridad Mericano tabata uza como su baca di lechi pero cu tambe tabata wordo uza pa labamento di placa entre otro.
Gobierno Mike Eman a trece un grupo di delincuente Aruba pa realisa e proyecto di Citgo cu a mancha credibilidad di Aruba mundialmente.
Pa Pueblo di Aruba e pregunta ta keda, cuanto placa Gobierno Mike Eman a gasta pa e proyecto Citgo? Cuanto placa a gasta na recepcionnan na cual criminalnan tambe por a fiesta?
Cuanto placa salida di Valero a costa Aruba na e forma cu Valero mester a bay pa Nicolas Maduro por a drenta?
Pero esaki no ta e unico preguntanan riba loke Gobierno Mike Eman a haci cu placa di Pueblo. Mas y mas Pueblo di Aruba ta pidi DIARIO pa bay tras di placa cu a wordo paga pa tur e proyectonan di Bo Aruba, cu a exigi pa contractonan wordo firma, terenonan a wordo cumpra y trabou wordo entrega.
Kico a pasa realmente cu e proyectonan aki? Pakico Aruba tabata tin mester di tanto rotondo, waterval? Pakico Aruba tabata tin mester di un tram y cual terenonan a cumpra of laga di cumpra?
Segun rapport oficial, no tabata tin bon administracion manera por a spera di e fondonan aki.
Awe cu Pueblo di Aruba ta bay eleccion, e tin pregunta clave pa wordo contesta na Gobierno di Mike Eman cu a bay sconde pa ni como Miembro di Parlamento e no mester a enfrenta e Pueblo cu awe e kier pidi sigui crea oportunidad pa e destrui Aruba!
