Tisa LaSorte, CEO di AHATA:
ORANJESTAD (AAN) Tisa LaSorte, CEO di AHATA, den entrevista cu DIARIO a declara cu e problema di ladronicia riba turista, ta algo cu semper ta bay tin.
“Mi no ta kere cu yega un momento cu por bisa cu no tin ningun persona cu tin intencion criminal na Aruba. Locual por haci ta realiza mas esfuerzo pa prevencion, y pa tuma accion despues cu algo pasa”, Tisa LaSorte a bisa.
AHATA ta keda den combersacion cu e teamnan di seguridad pa wak con nan por preoriza kico nan a haci riba e tipo di crimennan aki. “Pero tambe den colaboracion cu Security Foundation, y e teamnan di seguridad den hotelnan y pafo e sector ta traha riba prevencion tambe. Esey bo ta haci door di comparti informacion cu otro”, LaSorte a subraya.
El a señala cu tin diferente manera pa combati e problema, preveni y soluciona e crimen, pero esey ta sosode solamente ora tin un bon colaboracion entre e sector priva, polis y tambe e Security Patrol.
LaSorte a enfatiza cu esaki ta un problema di aña y cu por afecta nos turismo y sin turismo nos no tin pan riba mesa. Nos tin entendi cu falta polis en general, pasobra nos kier wak tambe mas patruya riba lama. Pero e problema di mas grandi awo ta cu KPA falta personal pa nan por haci tur e trabao tur caminda. Nan ta haciendo loke nan por, y nos ta wak cu nan ta actua hopi lihe, y ta soluciona crimen. Pero claro, nos por tin mas prevencion, y mas solucion, si nos tin mas polis.
“Pues, nos ta spera di por wak un gobierno nobo cu ta inverti den Cuerpo Policial” Tisa LaSorte a enfatiza na final.
