ORANJESTAD (AAN): Directie Natuur & Milieu (DNM) ta entusiasma pa anuncia e lansamento di e serie di podcast “Cadushi ta Zona cu Dyrick”.
Esaki ta un podcast dedica na entre otro educa y envolvi e comunidad local tocante Aruba su medio ambiente, naturalesa, herencia cultural, desaroyo sostenibel, conexion vital entre naturalesa, salud y mucho mas.
E serie, “Cadushi ta zona cu Dyrick”, ta presenta door di perspectiva unico y natural di Dyrick, un hoben curioso y pasiona cu Aruba su naturalesa y herencia cultural.
Tur esnan cu sintonisa e serie aki ta embarca riba un biahe cu ta expand’e perspectiva y tene horeanan habri, explorando Aruba su biodiversidad, tradicion, esfuerso di conservacion y retonan ambiental.
Den cada episodio Dyrick lo combersa cu diferente representante di un organisacion cu tin di haci cu e topico di e dia ey y tambe cu expertonan local. Den e formato di un combersacion nan lo elabora tocante nos historia cu ta inspira hopi hende na Aruba. Hunto cu Dyrick nos lo siña con pa proteha y conserva nos naturalesa y herencia pa futuro generacion di nos isla.
“Cadushi ta Zona cu Dyrick” ta mas cu djis un podcast, e ta un movemento pa conscientisa y inspira accion. “Door di comparti conocemento na un manera atractivo y cu por identifica cu ne, nos kier logra un impacto duradero den e manera con e comunidad ta conecta cu y balora naturalesa,” asina Directeur Gisbert Boekhoudt di Directie Natuur & Milieu a expresa.
E podcast lo ta disponibel riba plataformanan manera Spotify, Apple Podcasts, como tambe riba rednan social manera Facebook, Instagram y e YouTube channel di DNM. Lo tin un episodio nobo cada dos siman cu ta cubri topiconan manera Aruba su ecosistema unico, conservacion di fauna, cambio di clima, turismo sostenibel, identidad cultural, y hopi mas.
Keda pendiente pa e lansamento oficial.
