Gobierno Wever-Croes a scapa Aruba di hamber!

ORANJESTAD (AAN) — Aruba ta acerca un eleccion di sumo importancia. Hunto cu expertonan financiero y economico

DIARIO ta sigui analisa cifranan cu ta drenta na un forma continuo di instancianan oficial y cu ta entrega asina na historia e realidad di loke a pasa cu Aruba.

Pa huzga gobernacion di un pais mester interpreta cifranan y rapportnan experto na un forma independiente di politiconan y pa esaki mester haci uzo di relatonan financiero di instancianan cu hustamente a wordo introduci den e sistema di gobernacion di Aruba pa sigura cu politiconan no por sconde berdad na Pueblo.

Na mes momento DIARIO ta sigui tur informacion cu drenta di e comision di supervision Hulandes, cu a wordo introduci na 2015 na Aruba despues cu Reino a haya prueba di e situacion financiero sumamente peligroso cu Gobierno Mike Eman a crea pa Aruba y cu mester a cambia pa evita un desaster nacional.

Pa haya un bista di loke Gobierno Mike Eman a entrega na Gobierno Evelyn Wever-Croes, DIARIO a haci uzo di e cuenta anual di Aruba cu ta e documento financiero oficial di e pais, cu ta wordo prepara dor di Algemene Rekenkamer Aruba, e auditoria general independiente di Aruba cu mester controla a basa di Ley kico ta pasa cu placa di Aruba na man di gobernacion.

Ora tuma nota di e Relato Anual di Aruba pa 2017, ta topa cu expresionnan cu DIARIO ta presenta awe como prueba cu Gobierno Wever-Croes tabata tin como tarea pa scapa Aruba di hamber y miseria.

Den su presentacion di cifranan oficial di e gobernacion di gabinete Mike Eman, Algemene Rekenkamer Aruba ta rrece dilanti: “Den e ultimo añanan Algemene Rekenkamer a sigui e desaroyonan di e resultadonan financiero di e Pais di cerca.

A raporta frecuentemente riba e importancia pa tuma medidanan structural pa baha gasto y pa aumenta entrada,” Algemene Rekenkamer Aruba a mustra den su splicacion di e maneho financiero cu Gobierno Mike Eman a hiba segun cifra.

E autoridad financiero di Aruba ta sigui bisa cu: “Algemene Rekenkamer a conclui cu gobierno no a logra ainda pa pone e base solido pa logra e meta aki di un forma structural.”

E autoridad financiero di Aruba ta bisa cu Gobierno Mike Eman durante 2017 no a logra e norma stipula pa ley pa e deficit di

aña 2017.

Algemene Rekenkamer Aruba, e controlado oficial di placa di Pueblo di Aruba, a papia mes idioma cu Reino tambe a uza ora a bisa cu na 2017 prueba a wordo duna cu Gobierno Mike Eman a basa su mes riba loke mester wordo considera como entrada insigur.

Awe pues cu prueba  DIARIO ta mustra cu Algemene Rekenkamer a enfatisa cu e situacion financiero di Aruba na 2017 lo a pone extra

presion riba gobierno pa loke ta trata medidanan cu mester tuma na 2018.

Ora tuma nota di e medidanan cu Gobierno Wever-Croes mester a tuma na 2018 pa scapa situacion financiero di Aruba, mester tene pues na consideracion cu Aruba financieramente no por a sigui dilanti y cu Aruba sin medida lo a cay den un situacion cu e pais lo a muri di hamber.

E entradanan insigur di cual Algemene Rekenkamer Aruba ta papia, ta e entrada di un solo bes cu Gobierno Mike Eman a ricibi di Valero ora el a bay for di Aruba pa Citgo drenta y asina Citgo haci Aruba rehen di un contracto cu cual, manera DIARIO a expone na Pueblo den investigacionnan special, Citgo no por a cumpli.

Algemene Rekenkamer Aruba no ta e unico autoridad cu ta papia di e realidad di Aruba na man di Mike Eman.

E Comision di Supervision di Reino no ta laga duda tampoco di e maneho cu Mike Eman a hiba. CAFt no ta papia solamente di e debe nacional, pero ta mustra riba loke Gobierno Mike Eman a haci cu Aruba a base di e proyectonan PPS, cu Aruba te na 2043 lo mester paga.

E pagonan anual na 2021 a bira 82 Miyon Florin, pues a subi y Aruba segun e relato di CAFt di 2021 lo mester wordo paga te 2043.

CAFt ta mustra con mester scrap proyectonan PPP for di lista di proyectonan di Aruba den futuro.

Den mes rosea CAFt ta papia di e debe nacional, cu a mara Aruba na pago di interes.

Den tur rapport cu cay den man di DIARIO, por tuma nota di e cambio enorme cu e vision di Prome Ministro Wever-Croes a trece riba e base gubernamental di Aruba y sigur mester papia di un maneho financiero dirigi dor di Ministro di Asuntonan financiero Xiomara Maduro.

Na Januari 2020 ya e maneho financiero di Aruba a subi e caminda cu tabata indica cu Gobierno Wever-Croes a scapa Aruba di hamber. Den e pandemia cu a presenta, e forma dirigi di gobernacion cu entre otro alivio fiscal y asistencia na empresanan, a garantisa cu economia di Aruba a keda bibo en espera di expansion, cu awor ta wordo planifica.