Na momento cu Alexandra van Huffelen a crea gran speransa
*Gobierno no por wordo afecta directamente pero rumbo si
*Triunfo Partido di Agricultornan ta crea inseguridad total
ORANJESTAD(AAN)—Siglo 21sigur a presenta momentonan serio den e relacion entre Aruba y Hulanda, cu na entrada di decada 21, durante e recesion mundial a exigi pa Aruba cuminda tuma medida financiero.
Un pakete financiero a wordo logra na momento cu mundo tambe na 2007 mester a atende cu un recesion cu a exigi Aruba tuma medida.
Cambio di Gobierno na 2009 a nifica cu Aruba a bandona e pakete cu el a acorda cu Reino y Aruba a cuminsa crea un debe nacional mientras cu el a deshaci di mitar BBO.
Resultado tabata yegada di Ministro Plasterk cu a base di Statuut mester a duna prueba cu na prome lugar e bienestar di e Arubiano ta bini.
Confrontacion grandi entre Hulanda y Gobierno Mike Eman a haya tur atencion den Reino y a wordo sigui pa supervision cu tabata necesario pa evita cu Aruba lo a zink den e situacion financiero cu a wordo crea.
Sinembargo, e momento cu Raymond Knops a presenta riba plataforma como Ministro Hulandes encarga cu asuntonan den Reino, a trece tension nobo pero yegada di Alexandra van Huffelen a haci cu e relacion entre gobernantenan di Hulanda y di Aruba pa yega na solucion pa e situacion financiero di Aruba, a parce di a relaha.
Ta hustamente e hecho cu Aruba a alcansa e momento cu tabata parce cu un relacion mas trankil entre Reino y Aruba afecta pa Covid-19 y e crisis di Ukraine, lo a anuncia su mes y Aruba ta alcansa acuerdonan importante cu Hulanda pa sigui dilanti cu su maneho financiero, intrankilidad politico serio ta bati na porta di Hulanda.
E resultadonan di Eerste Kamer (Senado) Hulandes a causa consternacion grandi den e mundo politico Hulandes na momento cu e coalicion actual riba cual e Gobierno Hulandes ta forma a perde su mayoria den Eerste Kamer.
Esaki no ta nifica cu Gobierno mester bay cas ya cu esaki ta wordo dicidi den eleccion pa Tweede Kamer, pero si e ta entrega prueba cu e Pueblo Hulandes a perde su confiansa den e Gobierno actual.
Expertonan na Hulanda, mescos cu mundo politico di e pais, ta trata na tur forma pa yega na solucion pa e situacion cu a presenta na momento cu e Boerenbeweging (BBB) a canta victoria den eleccion pa Eerste Kamer cu 17 asiento.
Prome Ministro Mark Rutte cu for di 2010 tabata considera su posicion stabil, a cera ayera cu basta dolor di cabez, cu e ta comparti cu henter e pais cu ta en busca di un solucion.
E partidonan den gobierno y den oposicion na Hulanda ta di acuerdo riba un punto. Mester bini cambio, pa cual Pueblo a vota. Con ta sigura e cambio aki, ta e problema.
BBB no por participa den Gobierno di Rutte, cu mester duna contenido si na e decision di Pueblo Hulandes.
Kico e situacion actual ta nifica pa Aruba, ta e gran preocupacion pa Aruba mes.
Mientras anochi tabata cera ayera y ainda no tabata tin ningun indicacion con ta soluciona e situacion actual.
Preocupante ta e hecho cu e partidonan den Gobierno actual na Hulanda, a cuminsa ta sinti presion interno di nan miembronan, manera informantenan a splica DIARIO.
Esaki ta bira otro reto ya cu awor hasta personanan cu no a bay vota a cuminsa expresa nan mal contento y ta uni nan mes na e resultadonan di eleccion na Hulanda, cu nan ta bisa cu ta duna prueba di nan malcontento cu e forma cu Gobierno a traha.
DIARIO ta den contacto estrecho cu informantenan na Hulanda cu a habri 22 di Maart cu dolor di cabez den un situacion sumamente dificil y na un momento cu henter mundo ta marca pa inseguridad.
