Gastonan oficina Prome Ministro Evelyn ta 9 miyon Florin menos compara cu ex-Prome Ministro Mike

ORANJESTAD (AAN): Dialuna mainta dia 20 di maart, Prome Minister Evelyn Wever-Croes a publica su relato anual di su ministerio pa aña 2022.

Den e relato annual, riba pagina 31, tin e relato di gastonan di oficina di Prome Minister na unda cu ta indica cu cifranan concreto cu e gastonan di Prome Minister Wever-Croes ta 9 miyon Florin pa aña mas abou cu e gastonan di ex-prome minister Eman.

   Asunto di Personal: Den e acuerdo di gobernacion desde Gabinete Wever-Croes I, a palabra cu Gobierno di Gabinete Wever-Croes lo traha cu menos personal cu e cantidad di personal cu tabata tin den e Gabinetenan Eman di AVP.

   Gabinetenan Eman no tabata tin un maximo di personal y cierto momento, ex prome minister Mike Eman na final di su periodo tabata tin 147 persona trahando p’e. Pa Gabinete Wever-Croes I esaki a worde considera un abuso y a palabra na 2017 cu cada ministerio ta traha cu un maximo di 25 persona. E e palabracion aki a continua den Gabinete Wever-Croes II.

   Asunto di Salario: Na fin di 2022, e oficina di Minister President Wever-Croes tabata conta cu 23 persona cu ta henter e ekipo cu ta traha na e oficina aki cu ta inclui, siguridad, chauffeur, secretarianan, personal di limpiesa, personal administrativo, consehero, vocero.

   Tur segun e organogram cu ta aproba door di Departamento di Recurso Humano.

   Prome Minister aki a bisa:  “Claro cu e cantidad aki no ta suficiente pa haci tur e trabao cu mester worde haci. Y manera tur otro caminda den sector publico, mi oficina tambe tin falta di mas personal, pero mi personal ta traha duro pa e trabao worde haci cu eficiencia”.

   Si compara e cantidad aki cu e oficina di e ex prome minister Eman di AVP, e diferencia ta 124 persona menos y 9 miyon Florin menos, 80% menos. Si conta e 5 añanan di Prome Minister Wever-Croes, esaki ta un reduccion di gasto di 45 miyon Florin.

   Tambe tin otro gastonan di mandatario Wever-Croes y ex mandatario Eman. Entre otro gastonan di biahe, promocion y mercadeo, di lease auto. E diferencia di esakinan ta casi 1 miyon Florin entre e Prome Minister actual y e ex prome minister Eman, asina mes teniendo cuenta cu tur prijs a subi den e 5 añanan aki di Wever-Croes. Den total, maneho di Prome Minister Evelyn Wever-Croes den averahe ta scapa pais Aruba 10 miyon Florin pa aña desde 2017. Apesar cu tabata 5 aña hopi pisa, mester bisa si cu ta remarcabel cu Prome Minister Wever-Croes, cu menos hende, menos presupuesto a logra hopi mas cu e ex prome minister di AVP.