Encuesta ta mustra cu 86 porciento di Pueblo ta opone sospechoso manera Alan como candidato - Gobierno a cay pa investigacion di placa fraccion di POR pero Howell kier ta den Parlamento - Alan a trata di sconde berdad ora Wever-Croes corectamente a proclama fin di Gobierno
ORANJESTAD (AAN)— Eleccion 2021 sigur ta drenta historia como e momento cu e interpretacion moral di cierto politiconan a opone e concepto moral di e gran mayoria di Pueblo di Aruba.
E conclusion aki nos a alcansa, despues di e segundo debate di Camara di Comercio cu nos mester bisa cu a duna e resultadonan cu Aruba tabata spera pa e por dicidi con e lo vota dia 25 di Juni.
E segundo debate a entrega contestanan cu Pueblo tabata spera pero tambe a entrega periodismo na Aruba, instrumentonan pa por midi sigur kico por spera di cada politico pero mas ainda nan pensamentonan enfrente e pensamento di Aruba.
Uno di e figuranan cu sigur a capta nos atencion durante e dos debatenan di Camara di Comercio y tur otro debate na Aruba, ta Alan Howell, cu a presenta su mes cu un sonrisa cu mayoria di Pueblo no por a spera.
E sonrisa aki a haci Pueblo comprende cu tin un diferencia grandi den e concepto moral di Alan Howell y e concepto moral di Aruba, cu a bini dilanti den e resultadonan di encuesta cu a wordo teni despues di e debate y caminda Aruba por a expresa su mes riba e conhunto nacional di candidatonan pa Parlamento di Aruba.
Pa ilustra e diferencia entre concepto moral di Alan y e concepto moral di Aruba, mester bay un rato den historia di Alan Howell, cu nos ta topa te 2013 como Miembro di Cuerpo di Polis. Por asumi aki pues, cu Alan durante e lesnan cu el a sigui pa bira Polis, a haya suficiente sosten educacional pa comprende kico ta e diferencia entre bay bebe cofi na Ministerio Publico y wordo interoga dor di Ministerio Publico como sospechoso.
Alan Howell tabata parti di Cuerpo di Polis, encarga cu mantencion di Ley, te na e momento cu el a bira Coordinador di Mike de Meza di AVP, pa na 2017 bira parti di POR, for di cual hasta e lider Andine Bikker a distancia su mes y cu a keda den man di Alan Howell.
E prome diferencia entre Pueblo di Aruba y Alan Howell, ta basa riba e moral di e Arubiano pa papia berdad y no actua manera Alan ora e mester a bay duna cuenta y razon na Ministerio Publico pa malversacion di placa di fraccion di POR den Parlamento. Alan a trata di haci Pueblo kere cu el a bay bishita Ministerio Publico, cu a atende cu Howell como sospechoso loke ta completamente diferente.
Alan Howell a bira e motibo directo pa dia 25 di Juni Aruba bay eleccion, cu ta algun luna prome cu e temporada oficial di gobierno Evelyn Wever-Croes a termina.
Gobierno di Aruba a cay pa motibo di e hecho cu Ministerio Publico a anuncia cu el a cuminsa un investigacion hudicial riba loke a pasa cu placa di e fraccion di POR den Parlamento. Placa di Pueblo di Aruba, cu tabata na disposicion di e fraccion di POR pa asina Alan tabata tin medio financiero pa cubri gastonan pa e por representa Pueblo di Aruba.
E informacionnan di Ministerio Publico directamente ta papia di Alan Howell como sospechoso den e caso di “verduistering” (malversacion of na bon Papiamento ladronicia) di placa.
Esaki tabata e motibo pa Prome Ministro Evelyn Wever-Croes, completamente di acuerdo cu e base moral di Aruba, declara cu Gobierno a cay pasobra e no por a sigui mantene e Gobierno cu tabata tin mester di e sosten di Alan cu tabata un sospechoso cu Landsrecherche ta investiga.
Cu Evelyn Wever-Croes a actua a base di moral di Pueblo y Alan Howell a actua contra moral di Pueblo di Aruba a keda demostra durante e encuesta despues di e debate ora 86 porciento di participantenan na e encuesta a indica cu un sospechoso no por ta riba un lista politico y no por ocupa un funcion oficial manera Howell tabata haci como Vice Presidente di Parlamento.
Asina e diferencia entre moral di Alan Howell y e moral di Pueblo di Aruba a keda confirma.
Teniendo cuenta cu estadia di Benny Sevinger, candidato pa AVP den prizon y e presencia di Alan Howell den eleccion 2021 na Aruba, tin suficiente motibo pa e leynan cu ta regla eleccion na Aruba contene tambe e exigencia cu un persona cu ta wordo sospecha di un acto criminal, no por ta candidato pa bay representa Pueblo den Parlamento manera Pueblo a confirma durante e debate di Camara di Comercio cu un mayoria absoluto contra Alan Howell y Benny Sevinger como candidato pa bay eleccion pa por drenta Parlamento.
