ORANJESTAD (AAN): Apenas algun siman pasa tabatin keho cu e aumento den cantidad di pasahero cu kier bay vakantie,
a sorprende aerolineanan y nan mester a hasta cuminza busca forma unda ta haya jetfuel, pasobra e no tabatin suficiente na algun Aeropuerto na Merca. Varios vuelo mester a wordo cancela.
Pero awor cu e vuelonan a bira regular porfin y cu hopi extra avion bulando, ata un otro brote di Covid-19 causa principalmente pa e variante Delta hopi contagioso, a cuminza ta perhudica vuelonan.
Un di e aerolineanan cu a bati alarma pa mustra cu e brote nobo aki ta afectando nan negoshi, ta Southwest Airlines. Nan a bin ta nota un reduccion substancial den booking di pasashi. Esey ta poni den un nota cu nan a manda pa e directiva oficial di Securities and Exchange Commission na Washington. Southwest a indica cu nan e cancelacionnan aki a tuma un rumbo sin precedente den luna di Augustus, y nan ta culpa e brote nobo causa pa e variante Delta.
Si esaki sigui asina, Southwest ta pronostica cu nan ganashi lo bay ta 3% te cu 4% menos compara cu loke nan a bisa Wall Street apenas algun siman pasa. Y cu kizas e lo no por hasta haci ganashi den e cuartal di Juli pa September, cu normalmente ta uno di esnan mas druk y cu aerolineanan ta haci mas ganashi cune.
Frontier Airlines tambe a bisa cu nan a mira un caida den booking di pasashi, y nan tambe ta liga esaki cu e variante Delta.
Ta normal cu viahe di vakantie ta cuminza baha pa September, ora cu scol y oficinanan ta habri bek, pero e ora ta viahe di negoshi tin di start bek.
Pero a sali na cla cu hopi compania grandi a pospone nan plannan di habri oficina bek, y si acaso no tin hende den oficina, e ora no tin motibo tampoco pa haci viahe y bishita clientenan.
