Minister di Finansa ta informa:
Aruba ta conta awo cu ‘investment ratings’ cerca Fitch, Standard and Poor’s y Moody’s
ORANJESTAD (AAN): Recientemente Minister Maduro di Finansa a wordo informa pa e compania di rating Fitch Ratings cu e rating di Aruba ta wordo hisa na nivel di inversion. Esaki ta un hopi bon noticia cu ta indica na inversionista y turista cu Aruba ta un Pais na unda nan inversion ta sigura.
Tabata na comienso di februari 2025 cu ehecutivonan di Fitch Ratings tabata na Aruba pa asina haci nan evaluacion financiero y economico di nos Pais pa cual nan a reuni cu diferente persona y instancia di interes. Entre nan a reuni tambe cu Minister Maduro di Finansa cu a repasa e trabounan cu Gabinete Wever-Croes a bin ta haci pa stabilisa Aruba despues di e pandemia.
E mandatario a splica tambe mas di e maneho financiero hiba pa mehora nos finansa publico pa logra laga atras deficit presupuestario y crea espacio fiscal den surplus pa por reduci debe, haci inversion necesario y crea un buffer pa por enfrenta retonan financiero cu por surgi.
Ta importante pa menciona cu awor tres diferente compania di rating ta califica Aruba como un Pais na unda nan inversion ta sigura. “Danki na e trabou haci den ekipo, un maneho financiero prudente y eficaz, awe nos por ta orguyoso cu Aruba ta goza di un ‘investment rating’ cerca tres companianan di rating, Fitch Ratings, Standard and Poors y Moody’s,” ta palabranan expresa pa Minister Maduro di Finansa, cu ta hopi gradici na su ekipo di trabou pa e resultado importante aki na bienestar di Pais Aruba.
