Keto bay recompensa di 15 mil Euro ta valido pa haya sa kendenan a asesina Gregori Lindomar Maduro

ORANJESTAD (AAN): Manera DIARIO a trece aña pasa caba, tabata na luna di April 2020, cu DIARIO a mustra con un homber di Aruba a wordo asesina na Haarlem, Hulanda.   

E victima a wordo identifica como Gregori Lindomar Maduro, y manera DIARIO a raport acaba, su curpa sin bida a wordo haya den un meer conoci como “Mooie Nel” na Hulanda.  Su curpa tabata lora den un pida lona y e tabata drief riba awa den e area directo unda Lindomar semper tabata cana eybanda.

   Gregori Lindomar Maduro alrededor di 10 aña pasa a dicidi pa establece su mes na Hulanda, y algo a bay robez dos luna y mey pasa, y el a wordo haya morto.   Aña pasa durante e programa famoso di AVRO-TROS na TV Hulandes, esta ‘Opsporings Verzocht”, a atende e asunto aki y a mustra cu Ministerio Publico a ofrece un recompensa di 15.000 Euro na e persona cu por tin e tip di oro pa Polis soluciona e asesinato aki.

   Gregori Lindomar Maduro di 31 aña no tabatin un bida facil na Hulanda, y pa basta tempo e no tabatin adres fiho. Segun e programa di TV, Gregori tabata haci algun trabao paki-paya, pa e por a sobrevivi.

   E relato a mustra cu Polis tin e sospecho, cu e cadaver di Gregori a wordo benta den awa den periodo di 8 Maart pa 11 di Maart den awa, pues te casi 1 luna despues el a wordo descubri.

   Ta ser sospecha cu un hende lo trece den un boto y mey-mey di e meer el a wordo benta den awa.  Nan intencion ta pa e pakete di lona aki lo a bay cu e cadaver pa fondo, pero esey no a socede.  El a djis keda  drief pa su cuenta como 1 luna largo.

    Den e pakete a descubri mosaico di 40 pa 60 centimeter tin mancha di verf cora. A base di e peso di tanto e curpa sin bida, mosaico, polis ta conclui cu lo tin dos persona cu lo por tin haber cu e morto di Gregori Maduro.

    Na September 2020 a detene un homber di 33 aña procedente di Ijmuiden.  Tambe a detene Mitchell van R. di 34 aña procedente di Haarlem.  Na luna di Maart cu a pasa, e homber Mitchell aki a hasta pidi permiso pa e bandona Prison pa asina bay atende asuntonan cu su casa y su yiu baby chikito. Despues di mas di 1 aña cu el a wordo ofreci, ainda e recompensa ta valido.