Relacionista Publico Meverly Romano:
*Na final di januari a parti 7 mil plachi
ORANJESTAD (AAN) – Den entrevista cu DIARIO, señora Meverly Romano, Relacionista Publico di Departamento di Impuesto (DIMP), a menciona cu DIMP a cuminza parti e plachinan di auto, for di mitad di December caba, cu tabata un luna hopi kibra door di hopi dia liber.
Pero for di final di januari nan a parti rond di 7 mil plachi, y aworaki, yegando fin di februari, ainda tin cu saca e cifranan pero nan ta bayendo tur dia. DIMP ta yuda parti mainta, entre 8or cu 9or, e pensionadonan, y despues di esey ta yuda e publico en general.
Tambe nan ta yuda henter dia e personanan cu a cumpra auto cu nan mester di un plachi nobo, y esnan cu tin plachi personaliza, of plach'i nomber.
Romano a señala cu loke nan a ripara ta cu e citanan ta yega te october, pasobra hopi hende ta busca nan plachi so. Hopi cita ta pa uno of dos plachi y esey ta yena tur e citanan cu e departamento tin disponibel.
“P’esey nos ta aconseha tur automobilista cu ta haci cita cu ta preferibel busca cinco, nos a habri e posibilidad pa busca plachi number, specialmente pa busca no di nan mes so, pero di nan famia tambe”, Meverly Romano a splica.
El a agrega cu nan ta haciendo ehercicionan pa nan habri mas fecha disponible pa acapara e gran mayoria pa mitad di aña 2025.
“Nos tin cu tene cuenta tambe cu nos tin hopi auto; nos tin alrededor di 92.800 number registra, yegando 93 mil. Nos sa si, cu no ta tur automobilista ta paga nan belasting. Nos sa cu ta un cantidad so ta paga nan impuesto, pero nos ta premira cu un 80 mil ta cumpli. Aworaki mi no tin e cifranan di compliance, pero tur biaha ta mustra den e direccion eynan”, Meverly Romano a comenta.
