Ken ta Minister di Finansa y Cultura  

Dialuna, dia  20 di september 2021 Pais Aruba a haya un Gobierno nobo, Gabinete Wever-Croes 2. Un Gobierno di 8 Minister y desde e dia ey, Xiomara Maduro ta encarga cu e carteranan di Finansa y Cultura. 

Ken ta Xiomara Maduro?

Xiomara tin 46 aña di edad, ta soltera y ta mama di un yiu homber, Ethan Ruiz, cu tin 14 aña di edad. Xiomara ta yiu di Antonia Ras, miho conoci como Chida y Antonio Maduro (q.e.p.d.), miho conoci como Tommy. Xiomara su mama  tabata traha na Casa Haime y New Amsterdam Store  y su tata na Bureau Interne Diensten den Gobierno.

            Xiomara a hereda su mama su sonrisa, cu ta un refleho di su curason y caracter. Su mama tin un bon curason y semper ta gusta yuda tur hende. Tras di su bunita sonrisa, tin un caracter fuerte y ‘e ta riba su punto’. Na un edad relativamente hoben Xiomara su  mama a cuminsa traha pa yuda su famia. Door di esaki su mama semper a motiv’e pa e studia.

            Su tata tabata un sosten grandi na momento cu ela drenta politica. Ta door di su tata, Xiomara a siña bira un persona hopi social cu ta gusta combersa cu tur hende. Su tata a inspir’e pa lesa hopi desde un edad jong pa asina amplia su conocemento tur dia. Lamentablemente Xiomara su tata a bay descansa net 6 luna prome cu eleccion di aña 2017.         Xiomara ta conoci como un mandatario carismatico y apesar di tur reto cu e ta enfrenta, semper e tin un sonrisa riba su cara. 

Educacion

            Xiomara a bishita Imelda Kleuterschool y a cuminsa Sint Dominicus College cu apenas 5 aña. Ora cu ela caba esaki, el a bay La Salle College MAVO unda cu na 1990 ela gradua como 'best geslaagde'. Xiomara a sigui studia y a bay Colegio Arubano HAVO y VWO, cual ela caba na aña 1995.

            Despues di esaki, Xiomara a bay studia na Hulanda, unda ela studia Management, Economie & Recht y a obtene su ‘Bachelor Degree in Economics’ na Hogeschool van Arnhem en Nijmegen na aña 1999.

            Xiomara a continua cu su estudio na Universidad di Groningen na unda ela a studia Nederlands Recht cu specialisacion den Bedrijfsrecht. Finalmente na november 2002 ela obtene e titulo di 'Meester in de Rechten' cual ta un logro cu e ta hopi orguyoso di dje. 

Carera profesional

            Xiomara a regresa Aruba bek na aña 2003 y ela traha 6 aña como Funcionario di Maneho (Beleidsmedewerker) na Meldpunt Ongebruikelijke Transacties (MOT), awor Financial Intelligence Unit. Durante su trabou ela capacita su mes como un Certified Anti-Money Laundering Specialist (CAMS) y tambe a sigui diferente curso pa asina amplia su conocemento riba e tereno aki. 

Comienso den politica

            Na aña 2009 ex-Minister President Nelson Orlando Oduber a yama Xiomara na su despacho pa puntr’e pa subi riba lista di partido MEP. Su prome reaccion tabata un hari duro ya cu el'a gar’e di sorpresa y e no a spera e peticion aki pero Xiomara a acepta e reto. Asina ela tuma e decision pa subi e tarima politico di Aruba como candidato number 9 riba e lista di partido MEP pa e districto di Playa. 

Carera politico

            Na augustus 2009 Xiomara a debuta como figura politico na momento cu ela participa na eleccion electoral den september 2009. Ora cu  lider honorario di MEP, Nelson Orlando Oduber a dicidi di no acepta su asiento den Parlamento di Aruba, secuencia di lista a pone cu Xiomara a bira Parlamentario di Pais Aruba. Di e manera aki ela cuminsa oficialmente den politica. Xiomara a asumi e funcion di Miembro di Parlamento pa 8 aña. Como Parlamentario Xiomara tabata conoci pa pa su actitud critico riba e maneho financiero. 

            Na aña 2017 a toca Xiomara e honor pa sirbi Pueblo como minister di Finansa, Asuntonan Economico y Cultura den Gabinete Wever-Croes. Como mandatario, Xiomara a demostra di por maneha e carteranan aki y a surpasa e reto financiero mas grandi cu Aruba a conoce den aña 2020, door di e pandemia cu a afecta henter mundo.

            Dia 20 di september 2021 Xiomara a huramenta como minister di Finansa y Cultura pa Gabinete Wever-Croes 2. Pa Xiomara e ta un honor pa por sigui sirbi Pueblo di Aruba.