CEDE ta satisfecho cu sponsornan contento di por yuda e proyecto Pitch Time

ORANJESTAD(AAN): E proyecto di CEDE Aruba yama Pitch Time ta uno den cual hobennan por wordo forma pa bira lidernan den comunidad.

   Pa algun tempo caba un grupo di hoben via Pitch Time a traha riba proyectonan  pa nan bario, cu ta proyectonan positivo y duradero y cu ayudo di sponsornan, nan por haci e proyectonan aki bira realidad.

   Despues cu a presenta e hobennan na Cas di Cultura Diamars y a duna un splicacion riba nan proyectonan, representantenan di e sponsornan a hiba palabra.

   Representante di Aruba Bank por ehempel a trece dilanti cu e banco ta sinti e deber y responsabilidad social y corporativo pa duna bek na comunidad, via e tipo di proyectonan aki.

   E representante di FCCA a trece dilanti cu nan ta hopi contento di por a participa na e proyecto bunita aki pa prome biaha.

El a splica cu e proyectonan cu FCCA a scoge pa yuda cune, ta cuadra cu FCCA su vision di bin cu proyectonan den bario y duna bek na comunidad.

E representante di e compania a bisa tambe cu lamentablemente no por a adopta tur e proyectonan bunita, pero e ta wak cu tin potencial pa mas di e proyectonan aki wordo ehecuta pa FCCA mes den futuro.

Setar N.V tambe ta un sponsor y representante di e compania a indica cu tin diferente proyecto interesante y bunita, di cual nan a scoge un proyecto di un app special pa identifica entre otro matanan den naturaleza y un proyecto di 3D printing, cu ta cosnan cu ta cuadra cu e tipo di compania cu Setar N.V ta.

Banda di esaki tabata tin otro proyectonan cu Setar ta haya interesante.

E representante di Triple A tambe a indica cu nan ta hopi contento di por yuda stimula hobennan pa aporta na un manera positivo na comunidad y asina stimula otronan tambe.