Kadetnan Hulandes cu velocidad halto a verf Ambiente Feliz den mitar dia

ORANJESTAD (AAN): Riba Diasabra, Fundacion Ambiente Feliz tabata contento di ricibi presencia di kadetnan di KMA cu ta un opleiding pa officier na Breda, Hulanda.

  Como 1 pa 2 biaha pa aña, e kadetnan aki tin riba nan programa cu nan ta pone algun ora di un dia pa duna un sosten social.

   Segun funcionaria Lukee Croes di Fundacion Ambiente Feliz, como parti di e educacion di e Kadetnan aki pa nan bin train y sigui nan educacion na Aruba, a dicidi na yuda Stichting Ambiente Feliz pa caba cu e parti di verf pafo.

   Nan a yega eynan di 7:30 am caba, pa asina 8:00 am nan a start cu un tempo masha rapido mes.  Nan a demostra cu e calor tropical no ta slow nan pa nada.

   DIARIO tabata presente y a calcula cu nan tabata entre 15 pa 18 hende cu a pone man na obra.  Nan a yega cu hopi animo, y segun e Kadetnan, nan ta contento cu toch den e tempo cortico aki di ta na Aruba, nan por a conoce un di e organizacionnan riba e isla y a logra haya sa mas di e trabao importante cu nan ta haci.

   E grupo di Kadet tabatin yen energia, y e prome 60 minuut ya nan a bay hopi bon, cu e cas pafo cubriendo cu verf.  Despues di esey nan a sigui cu e cura cu tin rond di e tereno di e lugar aki na Santa Cruz.

   E verf mes ta un donacion cu Ambiente Feliz a ricibi di gerencia di WEB Aruba NV.  Segun señora Croes, e proyecto aki a start na Aruba Doet cu boluntario di Arubaanse Voetbal Bond.  Nan a pone e prome capa di verf, y awor cu e kadetnan aki a bin, nan a duna un man pa e muraya a ricibi di dos capa.

   E funcionaria Lukee Croes di Ambiente Feliz a indica cu e edificio di nan conoci como “Cas Curazon” tambe pronto lo haya su turno pa wordo renoba, incluyendo cambio di dak, remodela e parti paden, y pensando riba necesidad cu e clientenan tin.